विरोधको अर्को भाइरल भाषण- आरक्षमा तारबार लाएपछि बँदेल खान पाइएन (भिडिओ)

हेटौँडा । केही दिनअघिमात्र आफूले आफैँलाई ‘बेइमान’ भनेर भोट माग्दै हिँडेका मकवानपुर-२ का गठबन्धन उम्मेदवार विरोध खतिवडाको अर्को विवास्पद भिडिओ सार्वजनिक भएको छ ।

उनले मनहरी गाउँपालिकाको मध्यवर्ती क्षेत्रनजिकै एक चुनावी कार्यक्रममा जंगली जनावर बँदेलबारे विवादस्पद अभिव्यक्ति दिएका छन् । आरक्ष वरपर बस्नेहरूको फाइदा-बेफाइदाबारे व्याख्या गर्दै उनले पहिले त्यो ठाउँका बासिन्दाले बँदेलको मासु खुवाउने गरेको तर आजकाल तारबार लगाएर उक्त अवसरबाट वञ्चित भएको बताए ।

उनले भने ‘अहिले इन्द्र बानियाँजीले भन्नुभो उताबाट तारबार बाँध्ने, यताबाट बाँध्ने, इलेक्ट्रिक लाउने, अनि ड्याम उठछ, ढ्याकढुक्क गर्ने अनि आउँदैन भन्नेकुरा ठीक हो । तर, घाटा पनि छ, यसो बँदेल घुम्न आउँथ्यो, स्वाट्ट पार्न पाइन्थ्यो, त्यो त नपाइने भो । कहिलेकाँही यहाँका साथीहरूले दाइ बँदेल छ भनेर यसो १-२ किलो पठाइदिन्थे, त्यो खान नपाइने भो ।’

खतिवडाको बँदेलको यो भाषण अहिले सामजिक सञ्जालमा चर्चाको विषय बनेको छ ।