झापामा ओलीले भने- प्रतिनिधिसभा चुनावमा डेढ सय सिट जित्ने मिसनमा छौं (भिडिओ)

काठमाडौं । नेकपा एमालेका अध्यक्ष केपी शर्मा ओलीले आगामी प्रतिनिधिसभा चुनावमा एकल बहुमत ल्याउने दावी गरेका छन् । उनले देशभरबाट १५० सिट जित्ने लक्ष्य पार्टीले राखेको बताए ।गृहजिल्ला झापाको दमकमा आयोजित चुनावी सभालाई सम्वोधन गर्दै ओलीले यस्तो दावी गरेका हुन् । उनले प्रत्यक्षमा कमसेकम १०५ सिट र समानुपातिकमा ५० सिट एमालेले जित्ने आँकलन प्रस्तुत गरे ।

ओलीले भने, ‘अघिल्लो चुनावमा प्रत्यक्षमा ८० सिट र समानुपातिकमा ४१ सिट नेकपाले जितेको थियो । तर, दुई तिहाइ बहुमत ल्याउन १३८ सिट चाहिन्थ्यो । तर, अहिले हामी एक्लै १५० सिट जित्ने मिसनमा अघि बढेका छौं ।’
झापामा राप्रपाले एमाले उम्मेदवारलाई भोट दिनेमा ओलीले कार्यकर्तालाई आश्वस्त तुल्याए । उनले राप्रपाप्रति अविश्वास नगर्न आग्रह गरे ।

झापामा एमालेले राप्रपासँग तालमेल गरेको छ । झापा ३ मा राप्रपा अध्यक्ष राजेन्द्र लिङदेनलाई एमालेले समर्थन गर्ने र अन्य क्षेत्रमा राप्रपाले एमालेलाई सहयोग गर्ने सहमति दुई दलले गरेका छन् । यो सहमति चुनावमा कार्यान्वयन हुने ओलीले बताए ।

Lदमकमा आयोजित पार्टीको सभामा सम्वेधन गर्दै ओलीले भने, ‘राप्रपाले एमालेसँग मिलेर काम गर्न खोजेको छ । हामीले त्यसलाई स्वागत गरेका छौं । ३ नम्बरमा हामी राप्रपालाई भोट दिन्छौं, जिताउँछौं । हामीले समर्थन गरेपछि जित्नुपर्छ, नत्र हाम्रो समर्थन के काम लाग्यो ?’

ओलीले झापामा एक क्षेत्र र दुई प्रदेशमा राप्रपालाई भोट दिन र बाँकी सबैमा सूर्यचिन्हमा मतदान गर्न आग्रह गरे ।
उनले भने, ‘कतै गाईंगुईं सुनेको छु, राप्रपाले हामीलाई भोट दिँदैन भन्ने । तर, राप्रपाले भोट दिन्छु भनेर सहमति गरेपछि दिन्छ । यसमा शंका गर्नु हुँदैन । विश्वासका साथ लागौं । राप्रपाले दिँदैनथ्यो भने हामी डण्डा लगाउँथ्यौं र ? दिँदैनथ्यो भने दिन्न भन्थ्यो । दिन्छु भनेपछि दिन्छ । बेकारको अविश्वास गर्नु हुँदैन । हामी सहयोग गर्छु भनेका ठाउँमा गर्छौं, सहयोग लिने भनेका ठाउँमा लिन्छौं ।’