मोरङमा शेखरलाई साक्षी राखेर बागीले उम्मेदवारी निष्क्रिय पारे, प्रचण्डका ज्वाइँलाई समर्थन

काठमाडौं । मोरङ ६ (२) बाट बागी उम्मेदवारी दिएका कांग्रेस नेता नवीन दाहालले आफ्नो उम्मेदवारी निष्क्रिय बनाएको बताएका छन् । यहाँ गठबन्धनबाट माओवादीका जीवन आचार्य साझा उम्मेदवार छन् । आचार्य प्रचण्डका कान्छा ज्वाइँ हुन् । आचार्यपत्नी गंगा प्रचण्डको सचिवालयमा छिन् । केन्द्रीय कमिटीमा छोरी-ज्वाइँलगायतका आफन्तलाई राखेको भन्दै महाधिवेशनताका प्रचण्डको पार्टीभित्रै आलोचना भएको थियो ।

मोरङ ६ को प्रतिनिधिसभातर्फ नेपाली कांग्रेसका नेता शेखर कोइराला मैदानमा छन् ।

दाहालले गठबन्धन उम्मेदवार आचार्यलाई समर्थन गर्दै उम्मेदवारी निष्क्रिय पारेको बताएका छन् ।

दाहालले शेखर कोइरालासँग छलफलपछि आफ्नो उम्मेदवारी फिर्ता लिएको बताए । युवा नेता जीवन आचार्यले निर्वाचन क्षेत्र र प्रदेशकै समृद्धि र विकासका एजेण्डा अघि सारेर निर्वाचनमा होमिएको अवस्थामा त्यसको समर्थन गर्दै आफूले उम्मेदवारी फिर्ता लिएको उनको भनाइ छ ।

कोइरालासँग छलफलपछि विज्ञप्तिमार्फत दाहालले आफ्नो मुख्य चाहना जनताको अपेक्षा पूरा गर्न विकास र समृद्धि नै रहेको बताउँदै पार्टीले यही एजेण्डालाई मुख्य बनाएको बताउँदै गठबन्धनका उम्मेदवारलाई विजयी बनाउन अपिलसमेत गरेका छन् ।