शेरधन राईको पालिकामा कांग्रेस र माओवादीका ५५ जना एमालेमा प्रवेश

भोजपुर । नेकपा एमालेबाट प्रतिनिधिसभा उम्मेदवार शेरधन राईको गृहपालिका आमचोकमा कांग्रेस र माओवादीका नेता-कार्यकर्ता एमाले प्रवेश गरेका छन् ।

पछिल्लो दुईपटक माओवादीले जितेको यो पालिकामा एमालेलाई परेको चोट बिहीबारको प्रवेशले मंसिर ४ मा पूर्ति हुने पार्टीका जिल्ला नेताको दाबी छ ।

आमचोक- ८ दुम्मानामा बिहीबार आयोजित चुनावी कार्यक्रममा ५५ जनाभन्दा बढी प्रवेश गरेको सचिव किरण राईले बताए ।

एमाले प्रवेश गर्नेहरूमा माओवादीका दुर्गाबहादुर श्रेष्ठ, भीमबहादुर श्रेष्ठ, जगतबहादुर श्रेष्ठलगायत छन् । त्यसैगरी नेपाली कांग्रेस छाड्नेहरूमा डिकबहादुर राई, आशमान मगर, मदन श्रेष्ठ, कुमार श्रेष्ठ, रोशन परियार, प्रविन श्रेष्ठ, कुलबहादुर श्रेष्ठ, उद्धव श्रेष्ठ, युवराज श्रेष्ठ, तुलाराम श्रेष्ठलगायत छन् ।

उनीहरूले देशको विकास र समृद्धि एमालेबाट मात्र सम्भव भएको र मुख्यमन्त्री हुँदा शेरधन राईले उल्लेख्य काम गरेको भन्दै कांग्रेस-माओवादी गठबन्धन सत्ताका लागि मात्र भएको आरोप लगाएका छन् ।

वैशाख ३० को स्थानीय चुनावमा यहाँ कांग्रेसले एमालेसँग तालमेल गरेको थियो । कांग्रेसले पालिका उपाध्यक्ष र केही वडा आफू राखेर एमालेसँग तालमेल गरेपनि परिणाम सोचेजस्तो भएन ।

कांग्रेसले गाउँपालिका कमिटी सभापतिसहित ११ जनालाई कारबाही गरेको थियो । उनीहरूमाथिको कारबाही केही दिनअघि फुकुवा गरिएको छ ।