ओलीको आग्रह : माओवादी साथीहरू फर्किनुस्, नेकपा एसको मंसिर ४ मा अवसान हुन्छ (भिडिओ)

काठमाडौं । नेकपा एमालेका अध्यक्ष केपी शर्मा ओलीले माओवादी केन्द्रका नेता कार्यकर्तालाई प्रचण्डको पछि नलाग्न आग्रह गरेका छन् ।

झापामा आयोजित चुनावी कार्यक्रमलाई सम्बोधन गर्दै उनले भने, ‘हिजो हामीले नेकपा बनाएका थियौँ । तपाईंहरु माओवादीको होइन नेकपाको हुनुहुन्छ । प्रचण्डको पछाडि भुलले लाग्नुभयो । फर्किनुस् ।’

उनले माधव नेपाल नेतृत्वको नेकपा एस भन्ने पार्टी नै नभएको टिप्पणी गरे । एमाले सिध्याउने खेलको अवसान मंसिर ४ गते हुने बताए । त्यस पार्टीमा अलमलिएर बसेको केही साथीहरुलाई एमालेमा फर्किन आग्रह गरे ।

कांग्रेससहित जसपा र लोसपासहित अरुका पछि नलाग्न आग्रह गरे । स्वतन्त्र हुँ भनेर घण्टी बजाउँदै, लौरो टेक्दै आएकाहरुको भ्रममा नपर्न आग्रह गरे ।

उनले रवि लामिछानेलाई संकेत गर्दै भने, ‘कोहीलाई पत्रकारिता गर्दागर्दा राजनीति गर्न मन लाग्छ । ठीकै छ उम्मेदवार भएका छन् । तर, उनलाई भोट दिएर के गर्ने ? त्यस्ता मान्छे यहाँ पनि आएका होलान् । मैले धेरै बुझेको पनि छैन । तिनीहरुले केही गर्न सक्दैनन् । उम्मेदवार हुन पाइन्छ । तर, गर्ने के ?’