सबै सेलिब्रेसनतिर लागे, तर डी मारियाले पहिला विपक्षी कप्तान मोड्रिचलाई भेटे

काठमाडौं । कतारमा जारी विश्वकपको सेमिफाइनलमा मंगलबार राति क्रोएसियासँगको खेल सकिएको रेफ्रीले सिटी फुकेलगत्तै सबै अर्जेन्टिनी खेलाडी खुसियाली मनाउन लागे । मैदानभित्र पसेर एकले अर्कालाई बधाई दिइरहेका बेला एन्जेल डी मारियाले भने पहिला विपक्षी कप्तान लुका मोड्रिचलाई भेटे ।

निराश देखिएका ३७ वर्षीय मोड्रिचलाई डी मारियाले सान्त्वना दिए । यी दुई पुराना साथी हुन् । डी मारिया र मोड्रिचले दुई वर्ष सँगै खेलेका थिए, रियल म्याड्रिडमा । त्यसैले मोड्रिचलाई सान्त्वना नदिई डी मारियाले टीम सेलिब्रेसनमा जाने मन गरेनन् । मोड्रिचको सम्भवत: यो अन्तिम विश्वकप हो ।

उनकै कप्तानीमा चार वर्षअघि क्रोएसिया ऐतिहासिक यात्रा तय गर्दै फाइनलसम्म पुगेको थियो । अर्जेन्टिनाविरुद्ध ३-० गोलले पछाडि रहेपछि मोड्रिच मंगलबार राति ८१ औँ मिनेटमा सब्स्टिच्युट भएका थिए । डी मारिया भने क्रोएसियाविरुद्ध मैदान उत्रिएनन् । चोटसँग जुधिरहेका डी मारियाले क्वाटरफाइनलमा पनि नेदरल्यान्ड्सविरुद्ध अन्तिम केही मिनेटमात्र खेलेका थिए ।