६ वर्षअघि नै राष्ट्रिय टोलीबाट सन्‍न्‍यास लिएर फर्किएका मेस्सी : विश्वकप चुम्ने अन्तिम अवसर

इटहरी । सन् २०१४, २०१५ र २०१६ मेस्सीका खेल जीवनका सकसपूर्ण वर्षहरू थिए । सन २०१४ मा ब्राजिलमा भएको विश्वकपमा फाइनल पुगेर पनि मेस्सीको समूह जर्मनीसँग १-० ले पराजित भयो । लगत्तै २०१५ मा चिलीमा भएको कोपा अमेरिकामा आयोजकसँग पेनाल्टी सुटआउटमा अर्जेन्टिना ४-१ ले पराजित भयो ।

त्यसको ठीक अर्को वर्षपछि सन २०१६ मा अमेरिकामा भएको कोपा फाइनलमा पुनः चिलीसँगै अर्जेन्टिना पेनाल्टी सुटआउटमा ४-२ ले हार्न पुग्यो । यो पराजयमा मेस्सीले एक पेनाल्टीसमेत मिस गरेका थिए ।

तीन वर्षमा लगालग हार ब्यहोरेको अर्जेन्टिनाका कप्तान मेसीले अन्तर्राष्ट्रिय खेलकुदबाट सन्‍न्‍यासको घोषणा गरे । उनको सन्‍न्‍यासको खबर धेरै विश्व मिडियामा छायो । बीबीसी अनलाइनले सन् २०१६ जुन २७ मा हेडलाइन बनायोः ‘लियोनल मेस्सीः अर्जेन्टिनका फरवार्डले अन्तरास्ट्रिय खेलकुदबाट सन्‍न्‍यास लिए’ । यस्तै बेलायती समाचार संस्था रोयटर्सले सोहि दिन हेडलाइन बनायोः ‘मेस्सी भन्छन्- अन्तर्राष्ट्रिय खेलकुदबाट सन्‍न्‍यास लिएँ’ ।

सन्‍न्‍यास लिँदा मेस्सीले भनेका थिए, ‘ड्रेसिङ रुममा मैले सोचेँ कि यो मेरो राष्ट्रिय टोलीको अन्तिम खेल हो । यो मेरो लागि हैन । म अहिले यही सोचिरहेको छु । यो फेरि पनि एक विशाल दुःख हो ।’

सन्‍न्‍यास घोषणासम्म मेस्सीले स्पेनिस क्लब बार्सिलोनाबाट खेल्दा चार च्याम्पियन्स लिग र आठ ला लिगा जितेका मेस्सीले उत्कृष्ट खेलाडीलाई दिइने ‘बालोन डिओर’ पाँचपटक हत्याएका थिए । सन् २०१६ को कोपा फाइनलसम्म ओलम्पिकबाहेक अरु जिताउन नसकेकोमा व्यापक निराशा भएर सन्‍न्‍यास लिएका थिए ।

उनको सन्‍न्‍यास पनि भारत भ्रमणमा आएका ब्राजिलका महान खेलाडी रोनाल्डिन्होले बेलायती समाचार संस्था रोयटर्ससँग मेस्सीले राष्ट्रिय उपाधि नजिताएपनि उनी महान खेलाडी भएको प्रतिक्रिया दिएका थिए । बार्सिलोनाको ‘नु काम्प’ मा आफूले मेस्सीलाई सिकाएको र मेस्सीले पनि आफ्ना देशका खेलाडी नेयमारलाइ त्यही सिकाएको प्रसंग ल्याउँदै उनले मेस्सी, आफू र आफ्नो देशको फुटबल सम्बन्ध जोड्न खोजेका थिए ।

उनले भनेका थिए, ‘उनले साँच्चिकै अन्तर्राष्ट्रिय खेलबाट सन्‍न्‍यास लिएका हुन् भने खेलले उनलाई धेरै मिस गर्नेछ । अझैपनि उनी विश्वका सर्वोत्कृष्ट खेलाडी हुन् । उनीप्रतिको मेरो सम्मान कुनै हालतमा परिवर्तन हुँदैन ।’

बार्सिनोलाबाट क्लबबाट खेल्दा ज्यादै उपाधि पाएका मेस्सीले रास्ट्रिय टोलीबाट सन् २००८ को बेइजिङ ओलम्पिकको स्वर्ण पदकबाहेक केही हात नलागेपछि उनले हैरान भएर सन्‍न्‍यास घोषणा गरेका थिए । दुई महिना बित्दा नबित्दै उनको सन्‍न्‍यास टिकेन । मेसी राष्ट्रिय टोलीमा फर्किए र पुनः अन्तर्राष्ट्रिय हेडलाइन बने ।

सन् २०१६ अगष्ट १३ मा बेलायती अखबार गार्जियनले अर्जेन्टिनी अखबार ला नासिओनलाई साभार गर्दै लेख्योः ‘सन्‍न्‍यास निर्णय रद्द गर्दै लियोनल मेस्सी पुनः अर्जेन्टिना टोलीमा’ । अर्जेन्टिनामा पुनः आएको बारेमा बोल्दै मेस्सीले एक वक्तव्यमार्फत भनेका थिए, ‘पछिल्लो (कोपा) फाइनलको दिन मेरो दिमागमा धेरै कुरा खेले र मैले गम्भिररूपमा सन्‍न्‍यास बारेमा सोचेको थिए । तर, म यो देश (अर्जेन्टिना) लाई माया गर्छु । यो सर्टलाई माया गर्छु ।’

म्यारोडोनाको दुःखान्तपछिको मेस्सी करिअरको सुखान्त

सन् २०२० नोभेम्बर २५ मा अर्जेन्टिनाका महान् खेलाडी म्यारोडोनाको मृत्यु भएको । उनको मृत्युको दु:खद क्षणको आठ महिना नलाग्दै अर्जेन्टिनाको फुटबलमा सुखद खबर आयो । मेस्सीको कप्तानीमा रहेको अर्जेन्टिनाले ब्राजिलाई हराउँदै सन २०२१ जुलाई १० मा कोपा अमेरिका जित्यो । ब्राजिलको गृहमैदान माराकाना रंगशालामा १-० ले हराएर अर्जेन्टिनाले उपाधि जित्यो ।

कोपा जितेको रापताप डेढ वर्ष पनि नपुग्दै अहिले अर्जेन्टिना विश्वकपको फाइनलमा मेस्सीको कप्तानीमा २०१४ पछि पहिलोपटक पुगेको छ । कतारको लुसेल रंगलाशामा आइतबार हुने फाइलन खेलमा अर्जेन्टिनाले जारी विजेता फ्रान्सलाई हराएमा मेस्सीको सन्‍न्‍यासबाट पुनः खेलमा आएको अर्थ धेरै कोणमा व्याख्या हुनेछ । म्यारोडोनाले हेर्न नपाएको मेस्सीको उपाधि भनेर चर्चा हुनेछ । फ्रान्ससँग हारेमा दुईपटक फाइलन पुर्‍याएर पनि नजित्ने अभागी कप्तानको ‘दाग’ समेत उनले बोक्ने छन् ।