कतार विश्वकप : ‘गोल्डेन ग्लोभ’ का चार दाबेदार

काठमाडौं । डिसेम्बर १८ अर्थात आज राति सुलेल रंगशालामा फाइनल विजेतालाई विश्वकप ट्रफीसँगै विभिन्न विधामा उत्कृष्ट प्रदर्शन गर्ने खेलाडीहरुलाई पनि पुरस्कृत गरिन्छ ।

व्यक्तिगत खेलाडीहरुाई दिइने पुरस्कारमध्ये एउटा हो, गोल्डेन ग्लोभ । जुन विश्वकप प्रतियोगिताभरिको एक उत्कृष्ट गोलकिपरलाई प्रदान गरिन्छ ।

गोल्डेन ग्लोभ सन् १९९४ मा पहिलोपटक सोभियत संघका लिजेन्डरी किपर लेभ यासहिनलाई प्रदान गरिएको थियो । फिफा टेक्निकल अध्ययन टीमले प्रतियोगिताभर गोलकिपरको प्रदर्शनलाई मूल्याङ्कन गरेर गोल्डेन ग्लोभको विजेता छनोट गर्छ ।

कतारमा जारी विश्वकपमा चार गोलकिपर छन्, जो गोल्डेन ग्लोभका दाबेदार मानिएका छन् । को हुन् त ती चार गोलकिपर ?

डोमिनिक लिभाकोभिच

सन् २०१८ मा क्रोएसियाको सानदार फाइनल यात्राका नायक थिए गोलकिपर डानिजेल सुबासिच । जसले पेनाल्टी सुटआउटमा चार पेनाल्टी रोकेका थिए ।

अन्तिम १६ मा जापान र क्वार्टरफाइनलमा ब्राजिलविरुद्ध सानदार प्रदर्शन गरेका डोमिनिक लिभाकोभिचले सुबासिचले जत्तिकै चार पेनाल्टी रोके । लिभाकोभिचकै उत्कृष्ट प्रदर्शनमा क्रोएसियाले जारी विश्वकपमा तेस्रो स्थान प्राप्त गर्‍यो ।

सेमिफाइनलमा अर्जेन्टिनासँग पराजित भएपछि क्रोयसिया लगातार दोस्रोपटक फाइनल पुग्न सकेन । तर, उसका गोलरक्षक लिभाकोभिच गोल्डेन ग्लोभका बलियो दाबेदार हुन् ।

उनले प्रतियोगिताभरि ६ खेल खेल्दै तीन क्लिन सिट राखेका छन् । तीन गोल खाएका उनले २३ सेभ गरेका छन् ।

इमिलियानो मार्टिनेज

पछिल्ला वर्षहरुमा अर्जेन्टिनाको सफलताका पछाडि रहेका एक पात्र हुन इमिलानो मार्टिनेज । इङलिस क्लब एस्टन भिल्लाको गोलपोस्ट सम्हालिरहेका मार्टिनेजले जारी विश्वकपमा उत्कृष्ट प्रदर्शन गरेका छन् । उनकै उत्कृष्ट प्रदर्शनले अर्जेन्टिनालाई फाइनलसम्म पुग्न मद्दत गर्‍यो । मार्टिनेजको उपस्थितिले अर्जेन्टिनालाई शान्त र स्थिरताको भावना प्रदान गरेको छ ।

क्वार्टरफाइनलमा नेदल्यान्डविरुद्ध पेनाल्टी सुटआउटमा मोर्टिनेजको महत्व विशेष गरी जोडिएको थियो ।

जारी विश्वकपमा मार्टिनेजले ६ खेल खेल्दा तीन क्लिन सिट राखेका छन् । पाँच गोल खाएका उनले ५ गोल बचाउँदै गोल्डेन ग्लोभ दौडमा बलियो दाबेदारी प्रस्तुत गरेका छन् ।

यास्नी बुनोउ

कतार २०२२ मा मोरोक्कोको सानदार सेमिफाइनल यात्रामा बुनोउको उत्कृष्ट प्रदर्शनको ठूूलो भूमिका छ । विश्वकपमा पहिलो पटक सेमिफाइनल पुग्ने अफ्रिकी राष्ट्र बनेर इतिहास बनाएको मोरोक्कोले सेमिफाइनलअघि विपक्षीको एक गोल पनि खाएको थिएन ।

बुनोउले सेमिफाइनअघि समूह चरणमा क्यानाडाविरुद्ध आत्मघाती गोल भने व्यहोरेका थिए । सेमिफाइनलमा सविक विजेता फ्रान्ससँग २-० गोलको नतिजामा पराजित हुँदै बाहिरिएको मोरोक्कोेका लागि बुनोउ गोल्डेन ग्लोभको लागि बलिया दाबेदारका रुपमा प्रस्तुत भएका छन् ।

उनले जारी विश्वकपमा पाँच खेल खेल्दै तीन क्लिन सिट राखेका छन् र तीन सेभ गरेका छन् ।

हुगो लोरिस

फ्रान्सका कप्तान तथा गोलकिपर हुगो लोरिस एक उत्कृष्ट गोलकिपर हुन् । जसले सन् २०१८ मा फ्रान्सलाई विश्वकप उपाधि जिताउन महत्वपूर्ण भूमिका खेलेका थिए । जारी विश्वकपमा पनि उनकै कप्तानीमा फ्रान्स फाइनल पुगेको छ । लोरिसको हातमा उपाधि रक्षा गर्ने ठूलो दबाबका साथै अवसर पनि रहेको छ ।

लोरिसले कतारमा जारी फिफा विश्वकपमा ४ गोल खाँदै ८ सेभ गरेका छन् । जुन गोल्डेन ग्लोभका लागि बलियो दाबेदारी हो ।