‘गोल्डेन ग्लोभ’ पाएपछि मार्टिनेजको अनौठो पोज

नेपाल प्रेस

२०७९ पुष ४ गते १३:४९

दोहा। अर्जेन्टिनालाई ३६ वर्षपछि विश्वकप उपाधि जिताउँदै लियोनल मेस्सीको विश्व च्याम्पियन सपना पुरा गर्न महत्वपूर्ण भूमिका खेलेका एमिलियानो मार्टिनेज सर्वोत्कृष्ट गोलर गोलकिपर बने।

सर्वोत्कृष्ट गोलकिपरका रुपमा उनले गोल्डेन ग्लोब्स पाएपछि देखाएको एउटा ‘जेस्च’ भने भाइरल बनेको छ।

गोल्डेन ग्लोभ पाएपछि टिमतर्फ आउनेक्रममा विश्वकप ट्रफी नजिक पुगेर उनले गोल्डेन ग्लोब्सलाई दुई हातले कम्मरभन्दा मुनी, अगाडि राख्दै दर्शकलाई देखाएका थिए। धेरैले यसलाई अश्लिल पोजका रुपमा टिप्पणी गरेका छन्।

त्यसअघि अतिरिक्त समयको खेल सकिन एक मिनेट बाँकी छँदा गोलकिपर मार्टिनेजले वन भर्सेस वन बचाएर खेललाई टाइब्रेकरमा पुर्‍याएका थिए।

टाइब्रेकरमा उनले एउटा प्रहार रोके भने फ्रान्सको एउटा प्रहार फ्रेममा पर्न सकेन। अर्जेन्टिना सुरुका चारवटा प्रहारमा गोल गर्दै विश्व विजेता बनेको थियो।

त्यसअघि मार्टिनेजले क्वाटरफाइनलमा नेदरल्यान्ड्सविरुद्ध टाइब्रेकरमा दुईवटा प्रहार विफल बनाएका थिए। गत वर्ष कोपा अमेरिकाका रुपमा अर्जेन्टिनाले २८ वर्षपछि पहिलो सिनियर अन्तर्राष्ट्रिय उपाधि जित्दा मार्टिनेज महत्वपूर्ण सदस्य थिए।

उनले सेमिफाइनलमा भएको टाइब्रेकरमा कोलम्बियाका तीनवटा प्रहार रोकेका थिए।