प्रदेश १ मा पनि कांग्रेस संसदीय दलको नेता चुनावबाटै, यस्तो छ हिसाबकिताब

कसको पक्षमा कति सांसद ? (सूचीसहित)

सुमन पुरी

२०७९ पुष ६ गते १५:३६

विराटनगर । प्रदेश १ मा पनि नेपाली कांग्रेसभित्र संसदीय दलको नेता छान्न निर्वाचन हुने देखिएको छ । दलको नेताका लागि आकांक्षी चारजनाबीच सहमति नभएपछि निर्वाचनको तयारी गरिएको हो ।

प्रदेश १ मा देउवा पक्षका १, सिटौला पक्ष २ र कोइराला पक्षका १ गरी ४ नेता मुख्यमन्त्रीको दाबी गर्दै दलको नेता बन्ने दौडमा छन् । संस्थापन पक्षका अमृत अर्याल, सिटौला पक्षका उद्धव थापा र भीम पराजुली तथा कोइराला पक्षका केदार कार्की संसदीय दलका दाबेदार हुन् ।

यस प्रदेशमा नेपाली कांग्रेसले प्रत्यक्ष तर्फबाट १७ र समानुपातिकबाट १२ गरी २९ सीट प्राप्त गरेको छ । २ जनाबीचमा प्रतिस्पर्धा भए जित्न १५ मत आवश्यक पर्छ । तर, चारैजनाले चुनाव लडे बढी मत ल्याउनेले दलको नेता जित्नेछ ।

कांग्रेस स्रोतका अनुसार देउवा-सिटौलाबाट एकजनामात्र अघि सार्न प्रयास भइरहेको छ । तर, उम्मेदवारबारे सहमति भइसकेको छैन ।

प्रदेश सभापतिसमेत रहेका उद्धव थापाले पुस ९ वा पुस ११ बाट दलको नेता चयन प्रक्रिया सुरू हुने जानकारी दिए ।

‘हामी पुस ९ वा पुस ११ मा बैठक बसेर दलको नेता चयन प्रक्रिया थाल्ने तयारीमा छौं’, थापाले भने ‘यसबारे निर्णय गरेर प्रक्रिया थाल्नेछौं ’, थापाले भने ।

समानुपातिक सांसद थापाले आफू दलको नेता बने सरकारको नेतृत्वसमेत गर्नसक्ने दाबी गर्छन् ।

कोइराला पक्षका नेता तथा प्रदेशका आन्तरिक मामिला तथा कानूनमन्त्री केदार कार्की आफू प्रतिस्पर्धाबाट पछि नहट्ने बताउँछन् । एक कार्यकाल दलको प्रमुख सचेतकको भूमिका निर्वाह गरेका उनले आफू संसदीय दलको नेतामा प्रतिस्पर्धी स्वाभाविक भएको बताए ।

कार्कीले नेपाल प्रेससँग भने, ‘प्रदेशको संस्थापक सांसद हुनुको नाता, प्रमुख सचेतकको सफल नेतृत्व लिएको र सरकार संचालनको अनुभव समेत पाइसकेकोले अब मेरो दाबी दलको नेता हो । सरकारको नेतृत्व गर्न मुख्यमन्त्रीको जिम्मेवारी समेत सम्हाल्न सक्षम छु ।’

तत्कालीन संविधानसभा सदस्य तथा मोरङ ५ को प्रदेशसभा निर्वाचन क्षेत्र नम्बर २ बाट निर्वाचित अमृत अर्यालले आफूलाई भावी मुख्यमन्त्रीको रूपमा प्रस्तुत गर्दै चुनावी प्रचार गरेका थिए ।

संस्थापन पक्षका अर्याल पार्टीको मोरङ सभापतिको सफल भूमिका निर्वाह गरेको र अब प्रदेशलाई स्थापित गराउन समेत आफ्नो भूमिका अपरिहार्य भएको दाबी गर्छन् ।

‘यसअघि संसदीय सांसदमा खेलेको भूमिका, जिल्लामा गरेको नेतृत्व र संघीयता कार्यान्वयनमा प्रदेशलाई थप सवल बनाउन संसदीय दलमा मेरो दाबी हो’, उनले भने ।

विराटनगर महानगरपालिकाक पूर्वमेयर तथा कांग्रेस केन्द्रीय सदस्य भीम पराजुली मोरङ ४ को प्रदेशसभा निर्वाचन क्षेत्र २ बाट निर्वाचत भएसँगै दलको नेता बन्ने दौडमा छन् ।

सिटौला पक्षका पराजुलीले आफू दलको नेता भए राप्रपासहित साना दलको समेत समर्थन लिएर सरकार गठन गर्ने दाबी गरे ।