सुदूरपश्चिममा भतिजा प्रकाश देउवालाई दलको नेता बनाउन बालुवाटारको दबाब, सहमतिको सम्भावना क्षीण

भानुभक्त आचार्य

२०७९ पुष ७ गते १६:५७

कैलाली । सुदूरपश्चिम प्रदेशसभा सदस्यमा निर्वाचित कांग्रेसका प्रकाश देउवाले केही दिन पहिले भेटका क्रममा प्रदेश संसदीय दलका लागि प्रधानमन्त्री शेरबहादुर देउवालाई दबाब नदिन आग्रह गरे । संसदीय दलको चर्चामा रहेका सांसदहरूलाई प्रधानमन्त्री तथा पार्टी सभापति देउवालाई दबाब नदिएरै प्रदेशमा दलको नेता छनोट गर्नुपर्नेमा उनको जोड थियो ।

‘तपाईँहरू पनि मेरो ठूलोबुबालाई दलको नेता बनाइदिनुहोस् भन्दै भेट्न नआउनुहोस्, म पनि भन्दिनँ, त्यहीँ चुनाव लडौँ जो जित्छ उही बन्ने’, देउवाले ती नेतालाई भने ।

प्रधानमन्त्री तथा पार्टी सभापति शेरबहादुर देउवाका भतिजा हुन् प्रकाश देउवा । प्रधानमन्त्रीपत्नी आरजू राणा देउवाको प्रमुख स्वकीय सचिव हुँदै कैलाली ५ (२)बाट प्रदेशसभामा निर्वाचित भएका देउवा अहिले संसदीय दलको नेताका प्रमुख दाबेदार हुन् ।

पार्टीमा उनी महासमिति सदस्यमात्रै हुन् । तर, देउवा परिवार भएकै कारण उनी नै संसदीय दलको नेता बन्ने धेरै सम्भावना रहेको कांग्रेस नेताहरूको बुझाइ छ । कांग्रेस उच्च स्रोतका अनुसार प्रकाश देउवाले कांग्रेस प्रदेश सभापति वीरबहादुर बलायर, केन्द्रीय सदस्यद्वय एनपी साउद र रमेश लेखकलाई पनि यस विषयमा हस्तक्षेप नगर्न र आफूलाई सघाउन आग्रह गरिसकेका छन् । यी तिनैजना देउवा पक्षका नेता हुन् ।

एनपी साउद, रमेश लेखक र वीरबहादुर बलायरलाई छुट्टा-छुट्टै भेटका क्रममा संघको अवसरको लागि प्रदेशमा आफूलाई सहयोग गर्न आग्रह गरेको बताइन्छ । कैलाली ४ बाट निर्वाचित भएका बलायर, कञ्चनपुर २ र ३ बाट निर्वाचित भएका साउद र लेखक दुबै संघीय सरकारमा मन्त्री बन्ने लाइनमा छन् ।

यी तीनजनको सहयोगमा आफू सर्वसम्मत दलको नेता बन्ने वा निर्वाचन भएपनि यी तीनजनाले सहयोग गरे आफू विजयी हुने देउवाको अपेक्षा छ ।

कञ्चनपुरबाट निर्वाचित बहादुर थापा, देवानसिंह विष्ट, अछामबाट निर्वाचित मेघराज खड्का र कैलालीबाट निर्वाचित कमल शाह पनि दलको नेताको रेसमा छन् ।

कञ्चनपुरका थापा पार्टीका पूर्वजिल्ला सभापति तथा संविधानसभा सदस्य हुन् । विष्ट संविधानसभा सदस्य तथा महासमिति सदस्य हुन् । अछामका खड्का तत्कालीन जिल्ला विकास समिति सभापति तथा हालका प्रदेश महामन्त्री हुन् । उनले यसअघि पनि संविधानसभा र प्रदेशसभामा टिकट पाएका थिए । तेस्रो प्रयासमा अहिले सांसद बने ।

कैलालीका थापा पनि महासमिति सदस्य हुन् । संसदीय दलको नेतामा अहिले चर्चामा रहेकामध्ये देउवा पार्टीमा सबैभन्दा जुनियर हुन् । तर, प्रधानमन्त्रीसँगको पारिवारिक सम्बन्धका कारण उनकै सम्भावना बढी छ ।

सर्वसम्मतमा सकस

प्रकाश देउवालाई नेता बनाउन बालुवाटार लागे पनि उनलाई सर्वसम्मत हुन भने सहज छैन । पार्टीका केही सिनियर नेताहरूले यसमा असहमति प्रकट गर्दै आएका छन् । यस्तो अवस्थामा चुनावको सम्भावना बढी छ ।

दलको नेतामा आकांक्षी रहेका प्रदेश महामन्त्री खड्का पनि निर्वाचन समिति बनाएर प्रक्रिया अघि बढ्ने बताउँछन् ।

‘दलको नेता सर्वसम्मत हुन्छ’ उनले भने ‘तर, आवेदन दिने कुराहरू अघि बढ्छ ।’

कांग्रेस प्रदेश समितिले प्रदेशमा प्रदेश संसदीय दलको नेता चयनको लागि निर्वाचन समिति गठन गर्ने तयारी गरेको छ । शपथ ग्रहणपछि मात्रै दलको नेता छनोट गर्ने तयारी भइरहेको प्रदेश महामन्त्री खड्काले बताए ।

देउवा पक्षमै समस्या

सुदूरपश्चिम प्रदेशमा कांग्रेसका प्रत्यक्ष तर्फ १२ र समानुपातक ७ गरी १९ सांसद छन् । प्रत्यक्षका १२ मध्ये देउवातिर १० जना छन् । कञ्चनपुरबाट निर्वाचित देवानसिंह विष्ट र दार्चुलाबाट निर्वाचित विक्रम धामी बाहेक अन्य देउवा खेमाका हुन् । १४ औँ महाधिवेशनमा कोइराला समूहबाट केन्द्रीय सदस्य लडेर पराजित भएका कमल शाहले पनि अहिले गुट फेरेका छन् ।

दलको नेतामा दाबी गरिरहेका पाँचजनामध्ये चारजना देउवा र एकजना शेखर समूहका छन् । समानुपातिकमा पनि ७ जनामध्ये ६ जना देउवा पक्षका सांसद छन् ।

देउवा पक्षले सर्वसम्मत रूपमा उम्मेदवार अघि सारे उनै सर्वसम्मत हुने संकेत छ । तर, यो समूहमै सहमति हुने सम्भावना न्यून छ ।

यता कोइराला समूहका मानिएका देवानसिंह विष्ट आफूलाई पार्टी सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’ दुवैले मुख्यमन्त्रीको आश्वासन दिएका कारण आफू दलको नेता हुनेमा विश्वस्त छन् । प्रतिनिधिसभातर्फ माओवादी केन्द्रकी विना मगरलाई उम्मेदवार बनाएर आफूलाई मुख्यमन्त्रीको आश्वासनसहित प्रदेशमा उठाएको बताउँदै आएका छन् उनी ।

‘मेरो पार्टी सभापति र माओवादी अध्यक्ष दुवैले मलाई मुख्यमन्त्रीको रूपमा प्रस्तुत गर्नुभएको थियो । म त्यही सर्तमा प्रदेशसभामा उठ्न राजी भएँ । गठबन्धनले मुख्यमन्त्रीको रूपमा मलाई भनिरहेको बेला दलको नेता त म स्वाभाविक हो नि’, विष्ट सुनाउँछन् ।