माओवादीले उपनेता र सचेतक तत्काल चयन नगर्ने

काठमाडौं । नेकपा माओवादी केन्द्रले संसदीय दलको उपनेता र सचेतक तत्काल चयन नगर्ने भएको छ। पार्टी पदाधिकारी बैठकपछि बसेको संसदीय दलको बैठकले दलको नेता र प्रमुख सचेतक चयन गरेको हो।

दलको नेतामा अध्यक्ष पुष्पकमल दाहाल ‘प्रचण्ड’ र प्रमुख सचेतकमा हितराज पाण्डेलाई सर्वसम्मत चयन गरेको छ। तर, उपनेता र सचेतक पछि चयन गर्ने पदाधिकारी बैठकमा सहमति जुटेको उपमहासचिव गिरिराजमणि पोखरेलले बताए।

उपनेतामा वर्षमान पुन र जनार्दन शर्माको दाबी परेकाले छान्न नसकेको हो? भन्ने नेपाल प्रेसको प्रश्नमा उनले कसैको दाबी नपरेको बताए। उनले भने, ‘बाहिर उहाँहरूको दाबी परेपछि नछानेको भन्ने चर्चा चलेपनि त्यसमा सत्यता छैन।’