माओवादी मधेस प्रदेश संसदीय दलका नेतामा साह निर्वाचित
नेपाल प्रेस
२०७९ पुष २९ गते १६:१६
जनकपुरधाम । नेकपा माओवादी केन्द्र मधेस प्रदेश संसदीय दलका नेतामा भरत साह निर्वाचित भएका छन् ।
माओवादी दलका लागि आज भएको निर्वाचनमा ६ मत ल्याएर साह निर्वाचित भएका हुन् । उनीसँग प्रतिस्पर्धा गरेका युवराज भट्टराईले मात्र ३ मत पाएको निर्वाचन समितिले जनाएको छ ।
महोत्तरी क्षेत्र नम्वर १(२) बाट निर्वाचित साह यसअघि पनि दलका नेता थिए । उनी प्रदेशका निवर्तमान गृह तथा सञ्चारमन्त्री हुन् ।
यो प्रदेशमा माओवादीका ९ सांसद छन् । तर अदालतमा मुद्दा परेकाले दुई सांसद अझै पद तथा गोपनीयताको शपथ लिन पाएका छैनन् ।
माओवादी मधेश प्रदेश सरकारमा पनि सहभागी छ । तर दलका नेता चयन नभएकाले आज मुख्यमंत्री सरोज यादवसंगै जसपा, जनमत पार्टी र एमालेबाट १÷१ जना मन्त्रीले शपथ लिएपनि माओवादीले मन्त्री पठाएको छैन ।
स्रोतका अनुसार दलका नेता चुनिएका साह नै पुनः मन्त्री बन्नेछन् ।
नेपाल प्रेस
प्रकाशित: २०७९ पुष २९ गते १६:१६
प्रतिक्रिया
सम्बन्धित खवर
