राष्ट्रपतिबारे ठोस सहमति बनाउन तीन दलका शीर्ष नेताहरुबीचको बैठक सिंहदरबारमा

काठमाडौं । राष्ट्रपतिको निर्वाचनको विषयमा तीन दलबीच छलफल सुरु भएको छ । सिंहदरबारस्थित माओवादी संसदीय दलको कार्यालयमा माओवादी केन्द्र, एकीकृत समाजवादी र जसपाका शीर्ष नेताहरुबीच छलफल सुरु भएको हो ।

बैठकमा प्रधानमन्त्री तथा माओवादी अध्यक्ष पुष्पकमल दाहाल प्रचण्ड, वरिष्ठ उपाध्यक्ष नारायणकाजी श्रेष्ठ, शक्ति बस्नेत र जनार्दन शर्मा सहभागी छन् ।

नेकपा एसबाट अध्यक्ष माधव नेपाल, उपाध्यक्ष प्रमेश हमाल, महासचिव बेदुराम भुसाल, प्रकाश ज्वाला र जसपाबाट उपेन्द्र यादव र राजेन्द्र श्रेष्ठ सहभागी छन् ।

अहिलेसम्म भएका छलफल सकारात्मक भएकाले ठोस सहमतिमा पुग्नका लागि बैठक बस्नेको जसपा अध्यक्ष यादवले बताए । तीन दलबीच एउटा सहमतिमा पुगेपछि मात्रै कांग्रेससहित चार दलको बैठक बस्ने उनको भनाइ छ ।

वुधबार कांग्रेस शीर्ष नेताहरुको बैठकपछि चुनावअघिको पाँच दलीय गठबन्धन ब्यूँताउनेगरी छलफल अघि बढेको छ ।