केन्द्र सरकारबाट बाहिरिएसँगै कर्णालीमा समर्थन फिर्ता लिने राप्रपाको निर्णय

सुर्खेत । राष्ट्रिय प्रजातन्त्र पार्टीले कर्णाली प्रदेश सरकारलाई दिएको समर्थन फिर्ता लिने निर्णय गरेको छ ।

शनिबार बसेको केन्द्रीय कार्यसम्पादन समिति र संसदीय दलको संयुक्त बैठकले सरकारबाट बाहिरिने र समर्थन पनि फिर्ता लिने निर्णय गरेसँगै कर्णालीमा त्यसको प्रभाव परेको हो ।

केन्द्रीय समिकरणमा आएको फेरबदलका कारण कर्णालीमा राप्रपाले समर्थन फिर्ता लिने निर्णय गरेको प्रदेश सभा सदस्य सन्तोषी शाहीले जानकारी दिएकी छन् ।

उनले भनिन्, ‘केन्द्रका अनुसार यहाँ समर्थ फिर्ता लिएकै त भनौ । तर लिखित रुपमा फिर्ता लिएको छैन । केन्द्रमा सरकारबाट बाहिरिए सँगै कर्णाली प्रदेशमा हामी बाहिरिँदै छौं ।’

उनले समर्थन फिर्ता लिन केही प्रोसेस गर्नुपरे त्यो गर्ने बताइन् । ‘केन्द्रको त्यही निर्णयलाई प्रदेशले मानेपछि ठीकै छ, नत्र भोलि नै प्रदेशसभामा गएर समर्थनका लागि बुझ्छु केहि लेखेर दिन परे दिन्छु’, उनले भनिन् ।

तर राप्रपा केन्द्रमा बाहिरिएसँगै कर्णाली पनि बाहिरिएको भनेर भनिसकिएको शाहीको भनाइ छ ।