प्रदेश १ नामाकरण : एमाले र माओवादी एउटै कित्तामा ! नेकपा एसले फरक प्रस्ताव पेश गर्ने

विराटनगर । प्रदेश नम्बर १ को नामाकरणका सवालमा नेकपा माओवादी केन्द्र सरकारले ल्याएको नामका पक्षमा मत हाल्न तयार भएको छ ।

सरकारले जुनसुकै नाम प्रस्ताव गरेपनि पक्षमा मत हाल्ने निर्णय भएको माओवादीका प्रदेशसभा सदस्य गणेश उप्रेतीले बताए ।

उनले नाम राख्ने विषयमा माओवादी वाधक नबन्ने बताए । उनले, ‘भने हामी प्रदेशको नामकरणका विषयमा बाधक बन्दैनौ, सरकारले ल्याएको प्रस्तावको पक्षमा मतदान गर्छौ ।’

यता, एकीकृत समाजवादीले भने फरक नाम प्रस्ताव गर्ने तयारी गरेको छ ।

नेकपा एस संसदीय दलका नेता राजेन्द्रकुमार राईले प्रदेश १ को नाम ‘किराँत–कोसी वा किराँत–सगरमाथा’ मध्ये एक पेश गर्ने तयारी भएको बताए ।

उनले प्रदेश १ को नाम बहु पहिचानको आधारमा हुनुपर्ने बताए ।

राजेन्द्र राई मुख्यमन्त्री हुँदा प्रदेशको नाम किराँत राख्नु पर्ने भन्दै सार्वजनिक रूपमा अभिव्यक्ति दिँदै आएका थिए ।