अनमोलले छड्केसँगै छक्का पञ्जालाई पनि दिए शुभकामना

काठमाडौं । सुपरस्टार अनमोल केसीको नयाँ चलचित्र ‘छड्के २’ भोलि रिलिज हुँदैछ । सँगसँगै रिलिज हुँदैछ, हिट सिक्वैल छक्का पञ्जा । यी दुई चलचित्रको भिडन्त चासोका साथ हेरिएको छ ।

रिलिजको अघिल्लो दिन प्रतिस्पर्धाको भावना बिर्सेर छाती फराकिलो बनाउँदै अनमोलले दुवै चलचित्रलाई एकसाथ शुभकामना दिएका छन् । सामाजिक सञ्जालमा स्टाटस लेख्दै उनले आफ्नो चलचित्र छड्के २ र छक्का पञ्जा ४ लाई शुभकामना दिएका हुन् ।

अनमोलले नेपाली चलचित्र क्षेत्र सबै नेपालको शान र पहिचान भएकाले यसलाई संरक्षण गर्नु सबैको दायित्व भएको बताएका छन् ।

उनले लेखेका छन्, ‘भोलिदेखि तपाईंहरुसमक्ष प्रदर्शनमा आइरहेका दुई चलचित्रहरु छड्के २.० र आदरणीय दाई दिदीहरुको छक्का-पञ्जा लाई म मेन्डग र हाम्रो टिम छड्के २.० को तर्फबाट शुभकामना व्यक्त गर्न चाहन्छु । हजुरहरुको साथ र आशीर्वाद नै हाम्रो लागि काम गर्नै प्रेरणा र उर्जाको स्रोत हो ।’

छक्का पञ्जा टिमको तर्फबाट भने कसैले पनि छड्कालाई शुभकामना दिएका छैनन् । स्वस्थ प्रतिस्पर्धालाई आत्मसात गर्दै अनमोलले लेखेको स्टाटसले उनीहरुलाई पनि अवश्य नैतिक दवाव पर्ने छ । नेपाली चलचित्र क्षेत्रमा सालिन र अनुशासित नायकको छवि बनाएका अनमोलले यो स्टाटसले धेरैको मन जितेको छ ।