सिरहामा तलब नपाएकाे भन्दै आन्दोलित सरसफाई कर्मचारी र प्रहरीबीच झडप

जनकपुरधाम । लामो समयदेखि तलब नपाएको भन्दै आन्दोलन सुरु गरेका सिरहा नगरपालिकाका सरसफाई कर्मचारी र प्रहरीबीच झडप भएको छ ।

नगरपालिकाको बारुण यन्त्रले सडकमा पानी छर्किर्दै गर्दा आज बिहानैदेखि आन्दोलित सरसफाई कर्मचारीहरु रोकेका थिए । सो क्रममा प्रहरीले बल प्रयोग गदा झडप भएको हो ।

प्रहरीले आन्दोलित सरसफाई कर्मचारीहरुमाथि लाठी चार्ज गरेका छन् । सरसफाई कर्मचारीहरु भने प्रहरीमाथि झाडु लिएर प्रतिकार गरेका थिए । झडपका क्रममा एक प्रहरीको टाउँकोमा गम्भीर चोट लागेको जिल्ला प्रहरी कार्यालय सिरहाले जनाएको छ ।

आन्दोलनमा उत्रेका सरसफाई कर्मचारी सुनिल मेस्तरले शान्तिपूर्ण आन्दोलनमा प्रहरीले बल प्रयोग गरेको आरोप लगाए । उनले प्रहरीले दमन गरे कडा आन्दोलनमा उत्रने चेतावनी समेत दिए ।

चार महिनादेखि तलबभत्ता नदिएको र पटक पटक ताकेता गर्दा पनि वास्ता नगरेपछि बाध्य भएर आन्दोलनमा उत्रेको उनको भनाई छ ।

सिरहा नगरपालिकामा करिब ५० सरसफाई कर्मचारी कार्यरत छन् । उनीहरुले समयमा तलबभत्ता नदिएपछि गुजारा गर्न पनि समस्या भएको गुनासो गरेका छन् ।