अभिनेत्री वर्षा सिवाकोटी अभिनित चलचित्र‘ए साथी सुन’को टिजर सार्वजनिक

काठमाडौं । अभिनेत्री वर्षा सिवाकोटी र डेव्यु अभिनेता रमेश बानियाँको अभिनय रहेको सिनेमा ‘ए साथी सुन’को टिजर सार्वजनिक गरिएको छ ।

लभस्टोरी, थ्रीलर र कमेडी जनरामा निर्माण भएको चलचित्रमा आयन खड्का, सुशिल पोखरेल,  स्व. जयनन्द लामा, रमेश अधिकारी, बिमला गिरी लगायतका कलाकारको अभिनय रहेको छ। बाल कलाकार कृष्मा खड्का र इभान सन्जेलले पनि चलचित्रमा अभिनय गरेका छन् ।

जयनन्द लामा अभिनित अन्तिम सिनेमा समेत रहेको ‘ए साथी सुन’ यसअघि चैत्र १० गतेबाट प्रदर्शनमा आउने बताइएको थियो । प्राविधिक काम नसकिएकाले सिनेमाको प्रचारप्रसार पनि गर्न नभ्याएको भन्दै निर्माण टिमले रिलिज मिति पछि २०८० जेठ ५ मा सारेको छ।

राम राघव आचार्यको लेखन तथा निर्देशन रहेको सिनेमालाई बीना कार्की र सन्तोष कुमार राईले मिलेर निर्माण गरेका हुन् । इभान इन्टरटेनमेन्टको प्रस्तुतिमा निर्माण भएको सिनेमाको सह९निर्मातामा सुदीप पौडेल छन् । सिनेमालाई आरआर फिल्म्सले वितरण गर्न लागेको हो ।