विराटनगरकाे तुलसी सहकारीमा १२ करोड ९ लाख घोटाला, उपाध्यक्ष र सचिवसहित तीन जना पक्राउ

विराटनगर । मोरङको विराटनगरस्थित तुलसी (बहुमुखी) बहुउद्देश्यीय सहकारी संस्थाले निक्षेपकर्ताको रकम ठगी गरेको आरोपमा प्रहरीले ३ जनालाई पक्राउ गरेको छ ।

पक्राउ पर्नेमा सहकारीकी उपाध्यक्ष अनिता गौतम, सचिव सविना न्यौपाने र क्षेत्रीय प्रबन्धक मन्दिप खवास रहेका छन् । बचतकर्ताको रकम ठगीको आरोपमा थप ८ जनालाई खोजी गरिरहेको जिल्ला प्रहरी कार्यालय मोरङले जनाएको छ ।

प्रहरीका अनुसार सहकारीले १२ करोड ९ लाख ४ हजार ४८७ रूपैयाँ बराबरको रकम घोटाला गरेको देखिएको छ । ठगिए भनेर आउनेहरुको संख्या दिनदिनै बढेकाले घोटाला रकम बढ्ने मोरङका प्रहरी उपरीक्षक दीपक पोखरेलले बताए । अहिलेसम्म १२१ जनाले उजुरी दिएको उनले जानकारी दिए ।

‘हालसम्मको प्रारम्भिक अनुसन्धानबाट योजनाबद्ध तरिकाले ठूलो रकम हिनामिना गरी संस्थाका सदस्य एवं बचतकर्ताहरूलाई ठगी गरेको देखिन आएको छ’, प्रहरी उपरीक्षक पोखरेलले भने ।

उनका अनुसार प्रहरीले तुलसी सहकारीमा बचत गर्ने बचतकर्ताहरु, पीडितहरुले ५ दिनभित्र जिल्ला प्रहरी कार्यालय मोरङमा आइ जाहेरी वा उजुरी दिन अनुरोध गरेको छ।

विराटनगरमा पत्रकार सम्मेलन गर्दै जिल्ला प्रहरी कार्यालय मोरङका प्रमुख पोखरेलले २१ हजार ७१३ सदस्य रहेको सहकारीका विराटनगरमा मात्र ४ हजार बढी सदस्य रहेको अनुसन्धानबाट खुलेको जानकारी दिए ।

विराटनगरमा मुख्य कार्यालय भएको सकहारीले झापाको दमक, उदयपुरको गाईघाट र सिरहाको गोलबजारमा ३ वटा सेवा केन्द्रमार्फत कारोबार गरेको पनि प्रहरीले जनाएको छ ।

प्रहरीले सहकारीका क्षेत्रीय प्रवन्धकसहित ८ जना पदाधिकारीविरूद्ध जाहेरी परेको बताएको छ । नेपालभर नै कार्यक्षेत्र रहने गरी २०५२ चैत १३ गते सहकारी विभागमा सो सहकारी दर्ता भएको थियो ।

तत्कालीन विराटनगर उपमहानगरपालिका वडा नं ३ हाल वडा नं २ मा सञ्चालित तुलसी सहकारी संस्थाको देशैभर २१ हजार ७१३ जना सदस्य रहेको प्रहरी अनुसन्धानबाट खुलेको छ ।

गत फागुन १ गतेदेखि उक्त सहकारी संस्थाको कार्यालय विनाजानकारी बन्द भएपछि समस्या सुरु भएको थियो । बचतकर्ताहरूको रकम फिर्ता नदिई सञ्चालक समितिका पदाधिकारीहरू सम्पर्कविहीन रहेका थिए ।