जेठ १९ गते नीरफूल प्रदर्शन हुने

काठमाडौं । कोरोना महामारीको कारण तीन वर्षअघि रिलिज स्थगित भएको फिल्म ‘नीरफूल’ले आउँदो जेठ १९ गते प्रदर्शन मिति तय गरेको छ । ०७६ चैत ७ गते रिलिज हुनै कोभिडका कारण सरकारले फिल्म हलहरू बन्द गरेपछि ‘नीरफूल’को रिलिज रोकिएको थियो ।

निर्देशक फुलमान बलका अनुसार ‘नीरफूल’ भूकम्पका कारण बिछोडिएका परिवारको सदस्यहरूले पुनर्मिलनको लागि गरेका प्रयत्नमा आधारित फिल्म हो । रुबी भ्याली र काठमाडौंमा छायांकन गरिएको फिल्ममा दयाहाङ राई, रेखा थापा, शान्ति वाइबा, बुद्धि तामाङ, पुष्कर गुरुङ, जिम्मे छ्योइकी घिसिङ, राजन खतिवडा, सरोज अर्याल, सरिता गिरी लगायतले अभिनय गरेका छन् भने म्यानमारका तत्कालीन राजदूत ऊ लिउन उ र अभिनेत्री रेखा थापालाई विशेष भूमिकामा हेर्न सकिन्छ ।

‘भूकम्पपछिको भौतिक पुनर्निर्माणतिर त सबैको ध्यानको गयो, तर भत्किएका मन र भत्किएका सम्बन्धहरूको पुनर्निर्माणतिर कसैको ध्यान गएन’, फिल्मको कथावस्तुबारे निर्देशक बलले भने, ‘नीरफूलले तिनै भत्किएका मन र सम्बन्धहरूको पुनर्निर्माणको कथा भन्छ ।’

फ्रेण्ड्स अफ नेपाल–म्यानमार फ्रेन्डसिप काउन्सिलको सहकार्यमा सेलो प्रोडक्शनले निर्माण गरेको फिल्मको कार्यकारी निर्माता दुबईकी डोमा सोनाम हुन् । निर्माताको रूपमा कतारबाट माया केसी, बेलायतबाट दीपक श्रेष्ठ, इजरायलबाट चन्द्रमाया तामाङ, जापानबाट उदय लामा, अमेरिकाबाट रोज लामा, कोरियाबाट दिनेश लम्तरी मगर र नेपालबाट दिजेश श्रेष्ठ, तेन्जिन सोनाम लामा, अजितमान तामाङ, गणेश थापा, अशोक थापा, विके श्रेष्ठ लगायत छन् ।

प्रमोद कार्कीको छायांकन, अर्जुन पोखरेल र चन्द्रकुमार दोङको संगीत, निमेष श्रेष्ठको सम्पादन रहेको फिल्मको वितरक गोविन्द शाही र मनोज राठी रहेका छन् ।