आज धरानमा कवि वैरागी काइँलालाई नागरिक अभिनन्दन गरिँदै

काठमाडौँ । नेपाली कविता क्षेत्रका लिजेन्ड्री व्यक्तित्व वैरागी काइँलालाई धरानमा आज नागरिक अभिनन्दन गरिँदै छ ।

नेपाली प्रतिभा प्रतिष्ठान बेलायतका आयोजनामा भएको कार्यक्रममा काइँलालाई धरानको सैनिक भवनमा अभिनन्दन गरिने भएको हो ।

कोशी प्रदेशका प्रमुख पर्शुराम खापुङको प्रमुख आतिथ्यमा हुने अभिनन्दनमा मुन्धुमविद् समेत रहेका काइँलालाई संस्था र सर्वसाधारण दुवैको तर्फबाट नागरिक अभिनन्दन गरिने आयोजकले बताएको छ ।

धरानका मुन्धुमी कवि तथा पत्रकार प्रदीप मेन्याङ्बोले काइँलाको अभिनन्दनको कार्यक्रमले धरानका नयाँ र अग्रज दुवै पुस्तामा ऊर्जा भरिएको बताए ।

उनले भने, ‘कुनै क्षेत्रका स्थापित मानक बनाउन सफल स्रष्टालाई नागरिक अभिनन्दन गर्नु स्रष्टा र स्वयं संस्थालाई सम्मान हो । आज वैरागी काइँला सहित नेपाली प्रतिभा प्रतिष्ठान बेलायत दुवै आफैँ अभिनन्दित हुनेछन् ।’

काइँलाको नागरिक अभिनन्दन बाहेक संगीत साधक तथा गायक दीप श्रेष्ठलाई ‘प्रतिभा सम्मान’ तथा कवि सुदिप पाख्रिनलाई ‘प्रतिभा पुरस्कार’ प्रदान गरिने भएको छ ।