कोर्स चेञ्ज गरेर राष्ट्रपति बन्नसक्थ्यौं, तर धोकेबाज बन्न चाहिनँ : माधव नेपाल (भिडिओ)

काठमाडौं । नेकपा एकीकृत समाजवादीका अध्यक्ष माधव नेपालले आफूले चाहेको भए राजनीतिक कोर्स परिवर्तन गरेर भएपनि राष्ट्रपति हुनसक्ने तर अस्वीकार गरेको बताएका छन् ।

पार्टीनिकट भूपू सैनिक तथा प्रहरीको बैठकलाई सम्बोधन गर्दै उनले सत्ता गठबन्धनमा आफ्नो पार्टी निर्णायक भूमिकामा रहेको दाबी गरे ।

उनले भने, ‘मैले अस्तिको मिटिङमा भनेको थिए । ख्याल रहोस् । अहिले गठबन्धनमा १० वटा छ । म प्रधानमन्त्री भएको बेलामा २२ वटा पार्टीलाई एकताबद्ध बनाएर प्रधानमन्त्री भएको मान्छे । अहिले १० वटा पार्टी हुँदैमा आत्तिनुपर्ने छैन । साथ दिनेहरूलाई मिलाएर लाने हो ।’

उनले कांग्रेस र माओवादीलाई धोका दिएर राष्ट्रपति बन्न नचाहेको बताए ।

उनले भने, ‘हामीले चाहेको भए कोर्स चेञ्ज गरेर राष्ट्रपति बन्नसक्थ्यौं । तर, के हुन्थ्यो थाहा छैन । एकीकृत समाजवादी र माधव नेपाल धोकेबाज होइन । कांग्रेस र माओवादीलाई पनि धोका दियो भन्ने हुन्थ्यो । इज्जत र प्रतिष्ठाभन्दा ठूलो केही छैन । राष्ट्रपति पाउनु कुनै ठूलो कुरा थिएन । मैले धोका दिने ढंगले अघि बढ्न चाहिनँ ।’

उनले आफ्नो पार्टीले गठबन्धनमा सम्मानजनक भूमिका पाउने बताए । एमाले नेतृत्वमा रहेको अहंकारको कारणले प्रतिनिधिसभाको निर्वाचनमा केही धक्का खाएको नेपालको जिकिर थियो ।

ओलीलाई लक्षित गर्दै उनले भने, ‘त्यो अहंकारले गर्दा सबैलाई बेवास्ता भयो । प्रचण्ड प्रधानमन्त्री हुने अवस्था बन्यो । हाम्रो पार्टीलाई कुनै वास्ता भएन । सरकारमा सहभागी बन्नका लागि एकपटक पनि बोलाइएन । जब आफ्नो हातबाट जम्मै फुत्किने अवस्था भइसकेपछि बल्ल दौडधूप सुरू भयो । त्यहाँ भित्रपनि कसैकसैले हल्ला गरेजस्तो एकीकृत समाजवादीका नेतालाई राष्ट्रपति बनाउन तयार भएपनि नबनेपछि हामी के गरौं ? गलत कुरा हो । कुनै आधिकारिक प्रस्ताव आएको छैन । तर, बजारमा माधव नेपालले राष्ट्रपति मागेका थिए । मैले हुन्छ त भनेको थिएँ शेरबहादुरको पाउमा लम्पसार परे । यस्तो झूटो प्रचार गरेपछि दम्भ र अहंकारले नोक्सान पुर्‍याएको होइन ?’