भौतिक मन्त्रालयमा नारायणकाजीको तीन महिना, के-के गरे काम ? (पूर्णपाठ)

काठमाडौं । उपप्रधान तथा भौतिक पूर्वाधारमन्त्री नारायणकाजी श्रेष्ठ भौतिक पूर्वाधार तथा यातायात मन्त्रालय सामाजिक न्यायसहितको समृद्धि हासिल गर्ने राष्ट्रिय संकल्पको एउटा प्रमुख बाहकको रुपमा रहेको बताएका छन् ।

मन्त्रालय सम्हालेपछि गरेका कामबारे पत्रकार सम्मेलनमा जानकारी दिँदै उनले राष्ट्र निर्माणको यो अभिभारा पूरा गर्न इमानदारीपूर्वक अगाडि बढ्नुपर्ने आवश्यकतालाई हृदयंगम गरिएको बताए ।

उनले भने, ‘सरकारको प्राथमिकतालाई महत्वका साथ लागू गराउन सिंगो मन्त्रालयले आत्मसात गरेको अनुभूति गरेको छु । यसका बाबजुद देखापर्ने कैयौं चुनौतीलाई परास्त गर्न सिंगो मन्त्रालय उत्तिकै कटिबद्ध रहेको विश्वास लिएको छु । मन्त्रालयलाई नीतिगत, योजनागत र कार्यगत विषयहरुमा यहाँहरुबाट प्राप्त हुने उचित सुझाबलाई सदैव कार्यान्वयन गर्दै जाने प्रतिबद्धतासमेत व्यक्त गर्दछु ।’

उनले यातायात व्यवस्थामा कार्यगत, प्रणालीगत सुधार गर्ने काम थालनी भइसकेको बताए । लाइसेन्स छपाइलगायतका परम्परागत समस्या समाधान हुन केही समय लागेको मन्त्री श्रेष्ठको भनाइ छ ।

उनले भने, ‘स्मार्टकार्ड, मासप्रिन्टर खरिद प्रक्रिया अगाडि बढिसकेको छ । यसले मूर्त रुप लिएपश्चात सेवाग्राहीले एक हप्ताभित्र सवारी लाइसेन्स प्राप्त गरिसक्ने योजना निर्माण गरिएको छ । सवारीको रजिष्ट्रेसन प्रक्रिया सरल गर्ने र प्रदूषण टेष्टुको वर्तमान जटिलता सच्याएर नयाँ व्यवस्था मिलाउने काम टुंगोमा पुगेको छ ।’

सडकको स्थितिगत सुधार प्राथमिकताका साथ अगाडि बढेको उनको भनाइ छ । नियमित अनुगमन, सडकको स्थिति दुरुस्त राख्न मातहतका सबै अवयवको ठोस कार्ययोजनामा आधारित परिचालनमा विशेष ध्यान दिइएको उल्लेख गर्दै मन्त्री श्रेष्ठले चालू सडकहरु खाल्डाखुल्डी मुक्त राख्न उल्लेखनीय सफलता मिलेको दाबी गरे ।

मन्त्री श्रेष्ठलाई सरकारको पुनर्गठन हुँदा गृह मन्त्रालयमा सार्ने प्रधानमन्त्री पुष्पकमल दाहाल प्रचण्डको तयारी छ । त्यसैले मन्त्री श्रेष्ठले भौतिक मन्त्रालयमा नियुक्त भएपछि आफूले गरेको काम आज सार्वजनिक गरेका हुन् । उनी पुस ११ गते उपप्रधानसहित भौतिक पूर्वाधारमन्त्री नियुक्त भएका थिए ।