९ वर्षपछि क्यानडालाई ओडीआई मान्यता, पीएनजीले जोगाउन सकेन

काठमाडौं । च्यालेन्ज लिग ए को च्याम्पियन हुँदै आईसीसी विश्वकप क्वालिफायर प्लेअफमा स्थान बनाएको क्यानडाले ९ वर्षपछि एकदिवसीय मान्यता प्राप्त गरेको छ ।

नामिबियामा जारी प्लेअफमा पपुवा न्यूगिनी (पीएनजी) र जर्सीलाई पछि पार्दै क्यानाडाले ४ वर्षका लागि एकदिवसीय मान्यता पाएको हो । क्यानडासँगै यूएईले पनि ओडीआई मान्यता जोगाएको छ । आईसीसी विश्वकप लिग २ मा शीर्ष पाँचमा पर्न असफल भएको यूएईले एकदीवसीय मान्यता जोगाउन प्लेअफ खेल्नुपरेको थियो ।

प्लेअफमा ५ खेलमा ४ जित र एक हारको नतिजासहित ८ अंक जोडेर शीर्ष स्थानमा रहेको अमेरिकाले विश्वकपको ग्लोबल क्वालिफायरमा स्थान पक्का गरेको छ । यस्तै, यूएईले पनि ग्लोबल क्वालिफायर खेल्न पाउने भएको छ । यूएईले ४ खेलमा तीन जित र एक हारको नतिजासहित ६ अंक जोडेर तेस्रो स्थानमा छ । तर, अन्तिम खेलमा आज जर्सीसँगको खेलमा हार वा जित जुनसुकै नतिजा ल्याएपनि हेड टु हेडमा नामिबियालाई पछि पार्दै यूएई ग्लोबल क्वालिफायरमा स्थान बनाउन सफल भएको छ ।

यस्तै, नामिबियाले लिग २ बाटै एकदिवसीय मान्यता जोगाइसकेको छ । भने, पीएनजीको एकदीवसीय मान्यता गुमेको छ ।