कर्णाली प्रदेशसभाको प्रमुख प्रतिपक्षमा राप्रपाको दाबी, सन्तोषीले मागिन् विपक्षी दलका नेताको सीट

सुर्खेत । राष्ट्रिय प्रजातन्त्र पार्टीकी सांसद सन्तोषी शाहीले कर्णाली सभामा प्रतिपक्षको दाबी गरेकी छन् । केन्द्रमा सत्ता समीकरण फेरिएसँग यहाँ राप्रपाले माओवादी सरकारमाथिको समर्थन फिर्ता लिएको छ । मुख्यमन्त्री राजकुमार शर्माले दोस्रोपटक विश्वासको मत लिँदा राप्रपाबाहेक सबै दलका सांसदले मत दिएका थिए ।

बुधबार प्रदेशसभाको बैठकले सांसद शाहीले जनता र राष्ट्रको हितविपरीत आफ्नो दलगत स्वार्थमा कर्णाली प्रदेश सरकारको काम कारबाहीमाथि निगरानी गर्ने बताइन् । उनले सकारात्मक काममा रचनात्मक सहयोग सँगै कमजोरीमा खबरदारी गर्ने बताएकी छन् ।

सरकारको पक्षमा मतदान गरेको हुँदा सत्ता पक्षलाई मतदान गर्ने र सरकारको मन्त्री भइरहने दलहरू प्रतिपक्ष दलको रूपमा कसरी रहन्छन् सांसद शाही प्रश्न गरेकी छन् ।

सत्ता पक्ष पनि प्रतिपक्ष हुने भन्ने कुरा नेपालको संविधान ऐन कानूनविपरीत मात्रै नभएर यस्तो परिदृश्य देखिनु संविधानको ठाडो उल्लंघन भएको टिप्पणी गरिन् ।

उनले भनिन्,` देश विधि र संविधानले चलाउन सक्नुपर्छ । कर्णाली प्रदेशको प्रतिपक्ष दल राप्रपा हो । राप्रपालाई प्रतिपक्ष दलको रूपमा यो सदनमा सीटको व्यवस्था होस् ।’

उनले भनिन्, `कर्णाली प्रदेशमा चरम भ्रष्टाचार बेथिति प्रदेश सरकारले सुशासन गर्नुको साटो झन भ्रष्टाचार बेथितिलाई प्रशय दिइरहेको छ । यसले गर्दा नागरिकमा चरम निराशा र वितृष्णा पैदा भएको छ । प्रदेश सरकारले यसलाई रोक्न कुनैपनि संरचनाको विकास गरेको छैन र कुनै न्यूनीकरणका कार्यक्रम पनि सञ्चालन गरेको छैन । सुशासन कायम गर्न प्रदेश सरकारको प्राथमिकता रहेको छैन । यस्तो अवस्थामा राप्रपाले सरकारलाई सुझाव दिन चाहान्छ ।’

सांसद शाहीले भनिन्,` सांसद संख्या कम देखिए पनि ढिलोचाँडो राप्रपाको सिद्धान्तमा नआइ सुखै छैन । राष्ट्र निर्माण र देश विकासको लागि सत्यको बाटो नै राप्रपाले लिएको हो ।’