संसदमा गगन थापाको प्रश्न– प्रधानमन्त्रीलाई किन यति फुर्सद ? (भिडिओ)

काठमाडौं । नेपाली कांग्रेस महामन्त्री गगन थापाले प्रधानमन्त्री पुष्पकमल दाहाल प्रधानमन्त्री जस्तो बन्न नसकेको टिप्पणी गरेका छन् ।

शुक्रबार प्रतिनिधि सभाको बैठकमा बोल्दै उनले प्रधानमन्त्रीले चुस्त टिम बनाएर काममा लाग्न आग्रह गरे । उनले भने, ‘हाम्रो प्रधानमन्त्रीलाई किन यति फुर्सद छ ? उद्घाटन, शिलान्यास र भाषणमा समय व्यतीत गरिरहनु भएको छ । म चकित परिरहेको छु । प्रधानमन्त्रीले टीम चलाउने हो एक्लै हिँड्ने होइन । प्रधानमन्त्रीले योबेला सबैभन्दा चुस्त टीम बनाउनुपर्छ । टीमलाई चलाएर अघि बढ्नुपर्छ ।’

उनले प्रधानमन्त्रीलाई अहिले गठबन्धनको नेताका रुपमा बैठक बस्ने समय छोट्याउन पनि आग्रह गर्दै माओवादीको अध्यक्ष छु भन्ने पनि बिर्सेर काम गर्न आग्रह गरे ।

जनता निराश भएर आत्तिएका बेलामा प्रधानमन्त्री त प्रधानमन्त्री जस्ता हुनुपर्ने उनको भनाइ छ । चुनावपछि बनेको नयाँ सरकारले पनि जनतामा उत्साहित बनाउने नसकेको बताए ।

सरकारले साझा न्यूनतम कार्यक्रमको नजिजा ल्याउनेगरी प्रधानमन्त्री एक्सनमा लाग्नुपर्ने बताए ।