चालकको हत्या गरी जीप लुट्ने गिरोहका दुई जना १५ वर्षपछि पक्राउ

काठमाडौं । नेपालगञ्ज उपमहानगरपालिका-५ का २८ वर्षीय विकास केसीको हत्या गरी सवारीसाधन लुटेको १५ वर्षअघिको घटनामा संलग्न रहेको आरोप लागेका दुई जना पक्राउ परेका छन् ।

प्रहरीको केन्द्रीय अनुसन्धान ब्युरो (सीआईबी)ले ओखलढुङ्गा साविक नर्मदेश्वर गाविस-७ देवीथान घर भई ललितपुर
टीकाथली बस्ने ५३ वर्षीय भीमबहादुर बुढाथोकी र रामेछाप साविक सालु गाविस-६ घर भई काठमाडौं चावहिल बस्ने ६८ वर्षीय गुमानध्वज खड्कालाई पक्राउ गरेको हो ।

भे १ च ५८१ नम्बरको जीप चालक केसीलाई कपिलवस्तु साविक शिवपुर गाविस-१ शिवपुरस्थित महेन्द्र राजमार्गमा २०६४ चैत ३० गते धारिलो हतियार प्रहारबाट मृत अवस्थामा फेला परेको घटनाको सीआईबीले थप अनुसन्धान अगाडि बढाएको थियो ।

सीआईबीले पक्राउ परेका दुवैलाई वडा प्रहरी कार्यालय चन्द्रौटा कपिलवस्तु पठाइएको जनाएको छ ।