अध्यक्ष गणेश तिमिल्सिनासहित राष्ट्रियसभाको ८ सदस्यीय टोली रुस प्रस्थान (भिडिओ)

काठमाडौं । राष्ट्रियसभा अध्यक्ष गणेशप्रसाद तिमिल्सिनासहितको ८ सदस्यीय प्रतिनिधि मण्डल रुस प्रस्थान गरेको छ ।

बुधबार बिहान अध्यक्ष तिमिल्सिनासहित राष्ट्रियसभा सदस्य वामदेव गौतम, रमेशजंग रायमाझी, दिलकुमारी थापा रावललगायतको ८ सदस्यीय टीम रुस प्रस्थान गरेको हो । प्रस्थान गर्नुअघि सञ्चारकर्मीहरूसँगको कुराकानीमा अध्यक्ष तिमिल्सिनाले भ्रमणमा उच्चस्तरीय भेटघाट र दुई देशका संसदबीच सम्झौता हुने बताए ।

उनले दुई देशको संसदीय गतिविधिको बारेमा जानकारी गराउने, भ्रमणको आदान-प्रदान गर्ने, संसदलाई प्रभावकारी बनाउन एक अर्काबीच सिक्ने उल्लेख गरे । भ्रमणमा ९ जना उच्चस्तरीय व्यक्तित्वहरूसँग भेट गर्ने कार्यसूची रहेको पनि तिमिल्सिनाले जानकारी गराए ।

उहाँले भन्नुभयो, ‘दुवै सदनका प्रमुख र त्यहाँका सरकारी उच्च अधिकारीसँग र व्यवसायिक व्यक्तित्वहरुसँग र प्रदेश प्रमुखसहित करिब ९ जना विशिष्ट व्यक्तित्वसँग हाम्रो भेट हुनेछ । वैशाख १२ गते दिउँसो करिब ४:४५ बजे हामी यहाँ आउनेछौं ।’

भ्रमण टोलीमा रहेका राष्ट्रियसभा सदस्य वामदेव गौतमले दुई देशका संसदबीचको सम्बन्ध सुदृढ गर्ने सन्दर्भमा भ्रमण हुन लागेको बताए । रुसले राष्ट्रियसभाको प्रतिनिधित्व हुनेगरी उच्चस्तरको भ्रमण पहिलो
पटक बोलाएको बताए । आफूहरू नेपाली जनताको सद्भाव बोकेर रुस प्रस्थान गर्न लागेको भन्दै नेपाली जनता, नेपाल सरकार, राष्ट्रिय सभा संघीय संसदको सद्भावसमेत रुसमा व्यक्त गर्ने गौतमको भनाई थियो ।