पुरुषोत्तमको पक्षमा माहौल बनाउन एमाले वरिष्ठ उपाध्यक्ष पोखरेल मतदाताको घरदैलोमा

बारा । उपचुनावमा आफ्ना उम्मेदवार जिताउन नेकपा एमालेले वरिष्ठ उपाध्यक्ष ईश्वर पोखरेलसहितका नेताहरुलाई मैदानमा खटाएको छ । एमाले उम्मेदवार पुरुषोत्तम पौडेलसँगै पोखरेलसहितका नेता कार्यकर्ता घरदैलोमा निस्किएका हुन् ।

मैथली र भोजपुरी भाषासमेत बोल्ने पोखरेल मैदानमा उत्रिएपछि छुटै रौनक छाएको एमाले नेता मनोज पौडेलले बताए । पोखरेलसहितको टोलीले बुधबार करैयामाइको नरहीमा घरदैलो तथा मतदाता भेटघाट गरेको छ ।

सो अवसरमा पोखरेलले एमालेले जनताको पक्षमा काम गर्ने भएकोले मधेसको विकास पनि एमालेले नै गर्ने भन्दै पुरुषोत्तम पौडेललाइ जिताउन आग्रह गरे ।

उम्मेदवार पौडेलले बारा २ नम्बर क्षेत्रको क्षेत्रमा विकास गर्न आफू आएको बताए । उनले यहाँका जनता लामो समयदेखि पिडित भएकोले जनताले बोलाएर उम्मेदवार बनेको बताए ।

पौडेलले आजै गालोपट्टीमा मतदातासँग भेटघाट तथा घरदैलोमा गरेका छन् । बारा २ का मतदातालाई घर घरमै गएर भेट्ने प्रयास गरिरहेको उनले बताए । पौडेल बाराको परिचित नेता भएकाले आफूहरु आशावादी भएको मतदाताले बताएका छन् ।

बारामा बाहिर चर्चा आएभन्दा फरक माहौल रहेको र एमाले जित्ने पोजिसनमा पुगेको दावी सोही क्षेत्रको घरदैलोमा रहेका अनेरास्ववियुका केन्द्रीय सदस्य मनिष प्याकुरेलको छ । अखिल महासचिव नरेश रोकायको नेतृत्वमा विद्यार्थी टोली खटिएको छ ।