प्रधानमन्त्रीको भारत भ्रमणको एजेण्डाबारे संसदमा छलफल हुनुपर्छ : सांसद पन्त (भिडिओ)

काठमाडौं । नेकपा एमालेका सांसद रघु पन्तले प्रधानमन्त्री पुष्पकमल दाहाल ‘प्रचण्ड’ लाई भारतले सम्मानसाथ बोलाएपछि मात्रै भ्रमणमा जान आग्रह गरेका छन् ।

मंगलबार प्रतिनिधिसभाको बैठकमा बोल्दै उनले प्रधानमन्त्रीले नियुक्त भएदेखि नै भारत भ्रमणमा जान चाहेपनि अझै टुंगो नलागेको बताए ।

उनले भने, ‘बोलाउने सम्मानसाथ बोलाएपछि मात्रै देशको प्रधानमन्त्रीले गरिमासाथ जानु राम्रो हुन्छ । भारतसँगको सम्बन्ध हाम्रो लागि महत्वपूर्ण छ ।’

उनले प्रधानमन्त्रीको भारत भ्रमणको एजेण्डाबारे अहिलेसम्म संसदमा जानकारी नभएकोप्रति आपत्ति जनाए ।

उनले भने, ‘प्रधानमन्त्रीको त अनुहार हेर्न पनि दुर्लभ भइसक्यो । अहिलेसम्म संसदमा भ्रमणबारे जानकारी गराउनुभएको छैन । यो विषयमा संसदमा छलफल होस् ।’

भारतसँगका कतिपयको कुरा टुंगिन बाँकी रहेकाले आफ्नो आत्मनिर्णयमा समेत प्रभावित भएको बताए ।