ओली लक्षित गर्दै सांसद खतिवडाको टिप्पणी- भ्रष्टाचारीलाई जोगाउन प्रधानमन्त्रीकहाँ म्याउँम्याउँ गर्दैछन् (भिडिओ)

काठमाडौं । नेपाली कांग्रेसका सांसद रामहरि खतिवडाले नक्कली शरणार्थी प्रकरणमा दोषीलाई कारबाही गर्न माग गरेका छन् ।

प्रतिनिधिसभाको बैठकमा बोल्दै उनले नेपालको राजनीतिमा जसले धेरै बदमासी गर्छ, उसैले धेरै डकार्छ भन्ने कुरा आउन थालेको बताए ।

उनले भने, ‘जो कोही दोषी छ भने सरकारले गरेको कारबाही भोग्न तयार हुनुपर्छ । संसदमा ताली बजाएर होइन, कानूनअनुसार सजाय भोग्न तयार हुनुपर्छ ।’

खतिवडाले आफ्नो नाम पनि सो प्रकरणमा जोडिएकोप्रति भने आपत्ति जनाए ।

उनले भने, ‘म कतैबाट दोषी देखिए सजाय भोगेर राजनीतिक जीवनबाट बाहिर जान तयार छु । जो दोषी छ, त्यसलाई लुकाउनेलाई के कारबाही हुन्छ ? म प्रश्न गर्न चाहन्छु ।’

एमाले अध्यक्ष केपी शर्मा ओलीतर्फ संकेत गर्दै खतिवडाले आफ्नो मान्छे पर्न लागेपछि प्रधानमन्त्रीकोमा म्याउँम्याउँ गरेर भ्रष्टाचारीलाई जोगाउन खोजेको टिप्पणी गरे ।