फ्रेन्च लिगको शीर्षस्थानमा रहेको पिएसजीको सहज जीत

काठमाडौं । फ्रेन्च लिग वानमा पेरिस सेन्ट जर्मेन (पिएसजी) ले सहज जीत हासिल गरेको छ ।

घरेलु टोली ट्रोएसलाई ३–१ ले पराजित गर्दै लिगको शीर्षस्थानमा रहेको पिएसजीले उपाधि जित्ने सम्भावना कायमै राखेको छ ।

ट्रोएसको खेल मैदानमा आइतबार राति भएको खेलको ८ औँ मिनेटमा केलियन एमबाप्पेले सुरुवाती गोल गरेर पिएसजीलाई १–० को अग्रता दिलाएका थिए । त्यसपछि दुवै टोलीबाट गोलका लागि अनवरत प्रयास गरे पनि कुनै गोल हुन सकेनन्, अन्ततः पहिलो हाफ १–० मा टुंगियो ।

उता, दोस्रो हाफको ५९औँ मिनेटमा भिटिन्हाले गोल गर्दै पिएसजीको अग्रतालाई दोब्बर पारिदिए तर ८३औँ मिनेटमा जेभियर चाभालेरिनले गोल फर्काउँदै खेललाई २–१ को स्थितिमा ल्याए ।

अन्तिम समयमा रोमाञ्चक बन्न पुगेको खेलको ८६ औँ मिनेटमा पछि फावियन रुइजले गोल गर्दै पिएसजीलाई ३–१ को स्थितिमा अघि बढाए । अन्ततः खेल ३–१ मा टुंगिन पुग्यो ।

यस जितसँगै शीर्षस्थानको पिएसजीले ३४ खेलबाट ७८ अंक जोडेको छ भने पराजित ट्रोएस समान ३४ खेलबाट २२ अंक जोडेर १९औँ स्थानमा सीमित छ ।