सुदन किराँतीको दाबी- भ्रष्टाचारविरुद्धको अभियानबाट भागेर सरकार ढाल्न सम्भव छैन (भिडिओ)

काठमाडौं । संस्कृति, पर्यटन तथा नागरिक उड्डयनमन्त्री सुदन किराँतीले नक्कली भूटानी शरणार्थी प्रकरणका कारण सरकार नढल्ने दाबी गरेका छन् ।

बुधबार नयाँ बानेश्वरस्थित संघीय संसद भवनमा सञ्चारकर्मीहरुसँग कुराकानी गर्दै मन्त्री किराँतीले नक्कली भूटानी शरणार्थी प्रकरणका कारण सरकार नढल्ने बताएका हुन् ।

उनले सरकारले भ्रष्टाचार बिरुद्धको अभियान सुरु गरेको भन्दै यो अभियान नरोकिने स्पष्ट पारे । उनले भ्रष्टाचार बिरुद्धको अभिायानलाई पूर्णबिराम लगाउनेउपर प्रश्न उठ्ने भन्दै सरकारले दूधको दूध पानीको पानी भएर आफ्नो भुमिका देखाउने बताए । भ्रष्टाचारविरुद्धको अभियानबाट भागेर सरकार ढाल्नु सम्भव नभएको बताए ।

‘भ्रष्टाचार बिरुद्धको अभियान राज्यले सुरु गरेको छ । आजको नेपाली जनताको शत्रु भनेको भ्रष्टाचार र गरिबी हो । मलाई लाग्छ, यो अभियान रोकिँदैन र रोकिनु हुँदैन । भ्रष्टाचारविरुद्धको यो अभियान रोकेर रोकिँदैन । जसले पूर्णविराम लगाउँछ, त्योमाथि पनि प्रश्न उठ्छ । जसले लगाउन खोज्छ त्योमाथि पनि प्रश्न उठ्छ’, उनले भने, ‘जनताको अगाडी दुधको दुध पानीको पानी हामीले हाम्रो भुमिका देखाउनुपर्छ । सरकार डग्मगाउनु हुँदैन । मलाई लाग्छ सरकार ढल्दैन । यो सरकार जसले भ्रष्टाचारको बिरुद्धमा जेहाद छेडेर जान्छ । त्यसलाई जनताले राम्रो विवेकको तराजुले जोखेर राखेको हुन्छ । त्यसैले जो यो अभियानबाट भागेर सरकार ढाल्ने कुरा गर्छ त्यो सम्भव छैन । मलाई लाग्छ सरकार ढल्दै ढल्दैन ।’

मन्त्री किराँतीले पशुपतिमा निःशुल्क शव जलाउने प्रक्रिया अगाडि बढाएको बताए ।