खुमलटारमा थपियाे नेपाल बैंकको शाखा

काठमाडौं । नेपाल बैंकले ललितपुर महानगरपालिका खुमलटारमा शाखा विस्तार गरेको छ ।

बुधबार महानगरपालिकाका प्रमुख चिरीबाबु महर्जन र बैंकका प्रमुख कार्यकारी अधिकृत कृष्णबहादुर अधिकारीले संयुक्तरुपमा बैंकले ताम्रपत्र अनावरण गरी शाखा उदघाटन गरेका हुन् ।

उदघाटन कार्यक्रममा महानगरपालिकाका प्रमुख महर्जन, बैंकका सहायक प्रमुख कार्यकारी अधिकृत प्रकाश कुमार अधिकारी, बागमती प्रादेशिक कार्यालय प्रमुख पासाङ दोर्जी शेर्पा, बजारीकरण तथा अनुसन्धान डिभिजन प्रमुख बाबुराम काफ्ले, खुमलटार शाखाका शाखा प्रवन्धक जय प्रकाश यादव तथा स्थानीय संघ संस्थाका प्रतिनिधि, व्यापारी, ग्राहक तथा सर्वसाधारण नागरिकहरुको उपस्थिती रहेको थियो ।

कार्यक्रममा बोल्दै अधिकारीले स्थानीय जनता तथा संघ संस्थाहरुको पहिले देखिको अनुरोधलाई मनन गर्दै खुमलटार शाखा खोलिएको र महानगरपालिका खुमलटार लगायत महानगरपालिकाबासीलाई प्रतिष्पर्धात्मक माध्यमबाट सुलभ र सहज बैकिङ्ग सेवा दिने गरि बैंक आएको बताए ।

त्यस्तै, महानगरपालिकाका प्रमुख महर्जनले नेपालको जेठो नगरपालिकाको रुपमा रहेको महानगरपालिकामा नेपालको जेठो बैंक नेपाल बैंक खुमलटार शाखाको आगमनको संयोगले खुमलटार र सम्पुर्ण महानगरपालिकाको आर्थिक क्षेत्रमा नयाँ उमङ्ग पलाएको र महानगरपालिकाको वित्तीय पहुँच तथा आर्थिक वृद्धिमा कोसेढुङ्गाको भुमिका निर्वाह गर्ने विश्वास व्यक्त गरे ।