छुरा प्रहारबाट सेवाग्राहीको मृत्यु: होटल सञ्चालक आमाछोरा पक्राउ

काठमाडौं । धादिङको गल्छी गाउँपालिका- ८ निबुवा बोटमा बुधबार राति खाएको बिलको विषयमा विवाद हुँदा छुरा प्रहारबाट एक जनाको मृ‌त्यु भएको घटनामा संलग्न भएको आरोपमा होटल सञ्चालक आमाछोरासहित ३ जना पक्राउ परेका छन् ।

पक्राउ पर्नेमा शानदार होटल एन्ड लजका सञ्चालक सरस्वती पनेरु पन्डित र उनका छोरा निरज पक्राउ परेका हुन् । यस्तै पाल्पाको तानसेनका ३० वर्षीय किरण राना पनि पक्राउ परेका छन् ।

प्रहरीका अनुसार बिलको विषयमा विवाद भएपछि सरस्वतीले छोरा निरजलाई बोलाएकी थिइन् । निरज केटाहरु बटुलेर आएका थिए । निरजले बोकेको फोल्डिङ छुरा प्रहारबाट सख्त घाइते भएका विनोद थापामगरको उपचारका क्रममा काठमाडौंमा मृत्यु भएको थियो ।

युवतीहरुलाई बेश्यावृत्तिमा लगाएको आरोपमा प्रहरीले सरस्वतीमाथि मानव बेचबिखनमा पनि अनुसन्धान सुरु गरेको छ ।