गाउँपालिका अध्यक्षले ‘खेताला लगाएर’ कक्षा १२ को परीक्षा दिएको पुष्टि, तीनवटै परीक्षा रद्द गर्ने निर्णय

सिन्धुली । मरिण गाउँपालिकाका अध्यक्ष विमर्श मोक्तान प्रख्यातले खेताला परीक्षार्थी लगाएर कक्षा १२ को परीक्षा दिएको पुष्टि भएको छ । उनले दिएका तीनवटै परीक्षा रद्द हुने भएका छन् ।

मोक्तानको सिम्बोल नम्बर २२००३१२७ का दुई उत्तरपुस्तिका फेला परेपछि विवाद उब्जिएको थियो । यस विषयमा माध्यामिकि शिक्षा परीक्षा समन्वय समितिका अध्यक्ष तथा प्रमुख जिल्ला अधिकारी सुनिता नेपालको अध्यक्षमा बसेको बैठकले मोक्तानले दिएका परीक्षा रद्द गर्ने निर्णय गरेको हो ।

कपिलाकोट मावि महादेवस्थान परीक्षा केन्द्रमा मोक्तानलाई पुस्तकालय कोठामा एक्लै राखेर परीक्षा दिन लगाइएको सूचनाका आधारमा सिडिओसहितको टोलीले २९ गते परीक्षा केन्द्रमा अनुगमन गरेको थियो ।

त्यस दिन सामाजिक अध्ययन तथा जीवनपयोगी विषयको परीक्षा थियो । सो परीक्षा सकिएपछि बाहिरबाट लेखेर ल्याइएको उत्तरपुस्तिका मिसाउन खोज्दा पोल खुलेको हो ।

याे पनि पढ्नुस्: गाउँपालिका अध्यक्षले किर्ते गरेर १२ को परीक्षा दिएको आरोप, एउटै नम्बरका दुई उत्तरपुस्तिका भेटिए

एउटै नम्बरका दुईवटा उत्तर पुस्तिका फेला परेको र सो उत्तरपुस्तिका केन्द्राध्यक्षले बोर्डमा लेखी पठाएको भन्दै बैठकले मोक्तानले दिएका परीक्षा पूर्णरुपमा रद्द गर्न सिफारिस गर्ने निर्णय गरेको छ ।

साथै, बैठकले परीक्षालाई मर्यादित र व्यवस्थित रुपमा सञ्चालन गर्न नसकेको भन्दै केन्द्राध्यक्ष विष्णुमाया योन्जन, सहायक केन्द्राध्यक्ष शुक्रबहादुर माझी र निरीक्षक गोकर्णविक्रम साहलाई परीक्षा अवधिभर परीक्षासँग सम्वन्धित कुनै पनि काम गर्न नदिने निर्णय पनि गरेको छ । सो परीक्षा केन्द्रको परीक्षा सञ्चालनका लागि शिक्षक खेमहरि बराल नयाँ केन्द्राध्यक्ष तोकिएका छन् ।