एमाले भोजपुरले भन्यो- पहिचानका नाममा हाम्रा नेता-कार्यकर्तामाथि आक्रमण नरोके प्रतिवाद गर्छौं

भोजपुर । नेकपा एमाले भोजपुरले कोशी प्रदेश नामकरणको विषयलाई लिएर आफ्ना पार्टीका नेता तथा कार्यकर्तालाई निशाना बनाएको भन्दै आपत्ति जनाएको छ ।

एमाले भोजपुरका अध्यक्ष शरणकुमार राईले शुक्रबार एक विज्ञप्ति निकाल्दै हालै इलाममा कोशीका सांसद एवं पूर्वमन्त्री राम राना मगरमाथि भएको आक्रमण र केही समयअघि झापामा केपी ओलीमाथि हमलाको प्रयास अराजक र अपराधिक भएको बताएका छन् ।

पछिल्लो समय पहिचानवादीको आवरणमा केही समूहले दलको शान्तिपूर्ण कार्यक्रममा अवरोध गर्ने र नेतामाथि आक्रमण गर्ने काम भइरहेको विज्ञप्तिमा उल्लेख छ । नेता-कार्यकर्तामाथि भइरहेको आक्रम नरोके प्रतिवाद गर्ने अध्यक्ष राईले चेतावनी दिएका छन् ।

‘नेकपा (एमाले) का नेता तथा कार्याकर्ताहरू माथि भइरहेको श्रृंखलाबद्ध आक्रमण तत्काल नरोके त्यसको विरुद्ध डटेर प्रतिवाद गर्न नेकपा (एमाले) जिल्ला कमिटी भोजपुर तयार रहेको सम्बन्धित पक्षलाई जानकारी गराइन्छ’, विज्ञप्तिमा उल्लेख छ ।

लोकतन्त्रमा शान्तिपूर्ण रूपमा आफ्नो फरक मत र विरोधका कार्यक्रम गर्न पाउने अधिकार सबैलाई भएपनि आक्रमण गैरकानूनी भएको भोजपुर एमालेले जनाएको छ ।