निर्वाचनमा सत्तापक्षबाट कुटिकुटी मान्छे मारियो, व्यापक धाँधली गरियो : ओली (भिडिओ)

काठमाडौं । नेकपा एमालेका अध्यक्ष केपी शर्मा ओलीले सरकारले गरेको तीनै तहको निर्वाचनमा व्यापक धाँधली भएको बताएका छन्।

प्रतिनिधि सभाको बैठकमा सरकारले प्रस्तुत गरेको नीति तथा कार्यक्रममाथि छलफलको क्रममा बोल्दै उनले भने, ‘सरकारले तीनै तहको निर्वाचन शान्तिपूर्ण र निष्पक्ष रूपमा सम्पन्न गरी मुलुकमा संघीय शासन प्रणालीलाई सफल बनाएको उद्घोष गरेको दाबी गरेको छ। तीनै तहको निर्वाचन कुन हदसम्मको अराजकता, अशान्ति, त्रासदीपूर्ण, ठगी र जालसाजीपूर्ण थियो मैले यसअघि पनि भनिसकेको छु।’

मान्छे मारिएका छन्, घाइते भएका छन् बुथ कब्जा भएको छ। गणना नसकिँदै घोषण भएको छ। त्यो कसरी शान्तिपूर्ण निर्वाचन भन्न मिल्छ ? उनले प्रश्न गरे।

उनले थपे, ‘ती मान्छेहरूले आत्महत्या गर्‍या हुन् कि के गरेका हुन् ? भागेर गएकालाई घरमै गएर तानेर ल्याएर हत्या गरेको छ। यो सम्पूर्ण निर्वाचनमा सत्ताको दुरुपयोग गरेर व्यापक धाँधली भएका छन्।’