ओलीलाई माधवको प्रश्न- यती र ओम्नीमा गल्ती भेटिए जेल जान तयार छु भन्ने आँट छ ? (भिडिओ)

काठमाडौं । नेकपा माओवादी केन्द्रका सांसद माधव सापकोटाले एमाले अध्यक्ष केपी शर्मा ओलीलाई विगतका भ्रष्टाचार प्रकरणमा दोषी देखिए जेल जान्छु भन्ने आँट छ? भन्दै प्रश्न गरेका छन् ।

सोमबार प्रतिनिधिसभाको बैठकमा बोल्दै उनले प्रधानमन्त्रीले लडाकु शिविरमा घोटाला भएको देखिए जेल जान्छु भनेजस्तै ओलीलाई पनि त्यो आँट गर्न चुनौति दिए ।

उनले भने, ‘भ्रष्टाचारका कुरा उठे। भ्रष्टाचारका विषयमा उठेका कुरामा सहमत छु। रघुजी पन्तले पनि नैतिकताको कुरा गर्नुभयो । त्यै नैतिकता भएर होला प्रधानमन्त्रीज्यूले क्यान्टोनमेन्टका फाइलहरू खोलौं म दोषी रहेछु भने जेल जान तयार छु भन्नुभयो । प्रमुख प्रतिपक्षी दलको नेताले पनि यती र ओम्नीका फाइलहरू खोलौं, गल्ती रहेछ भने जेल जान तयार छु भन्ने आँट गरौं । सुरुवात त्यहाँबाट नै हुन्छ ।’

उनले ओलीले बाघले घास खाँदैन भनेर दिएको अभिव्यक्तिप्रति लक्षित गर्दै बाघले घास नखाने भन्दै बुढो भएपछि फट्याङग्रा टिप्न थाल्ने टिप्पणी गरे ।