काभा महिला भलिबल: श्रीलंकामाथि रोमाञ्चक जित निकाल्दै सेमिफाइनल नजिक काजाकिस्तान

काठमाडौं । श्रीलंकामाथि ३-१ को रोमाञ्चक जित निकाल्दै काजाकास्तान जारी काभा महिला भलिबल च्यालेन्ज कपको सेमिफाइनल नजिक पुगेको छ।

त्रिपुरेश्वरस्थित राष्ट्रिय खेलकुद (राखेप) को कभर्डहलमा सम्पन्न खेलमा पहिलो सेट २५-१६ ले आफ्नो पक्षमा पारेको काजाकास्तानले प्रतिस्पधात्मक दोस्रो सेटमा श्रीलंकालाई २८-२६ ले पराजित गर्यो।

उत्कृष्ट पुनरागमन गर्ने क्रममा श्रृलंकाले तेस्रो सेटमा २५-१८ को जित निकाल्यो । चौथो सेटमा पुगेको खेलमा अन्तिम सेट २९-२७ ले आफ्नो पक्षमा पार्दै काजाकास्तान सेमिफाइनल नजिक पुगेको हो । पराजित श्रीलंकाको भने सेमिफाइनल सम्भावना लगभग सकिएको छ ।

काजाकास्तानले प्रतियोगिताको पहिलो खेलमा सोमबार माल्दिभ्स माथि ३(० को जित निकाल्दा श्रीलंका उज्बेकिस्तानसँग ३-० को साझो सेटमा हार्यो ।

आज बिहान भएको पहिलो खेलमा कीगिस्तानलाई ३-० ले हराउँदै भारतले लगातार दुई जित निकाल्दै सेमिफाइनल नजिक पुग्यो ।

केहिबेरमा सुरू हुने खेलमा घरेलु टिम नेपालले बंगलादेशको सामना गर्ने छ । नेपालले पहिलो खेलमा कीर्गिस्तानलाई ३-० ले पराजित गर्दै शानदार सुरूआत गरेको थियो ।