काभा महिला भलिबल च्यालेन्ज कप: नेपाल भारतसँग पराजित

काठमाडौं । नेपाल काभा महिला भलिबल च्यालेन्ज कपअन्तर्गत समूह चरणको अन्तिम खेलमा भारतसँग ३-१ सेटमा पराजित भएको छ ।

त्रिपुरेश्वरस्थित राष्ट्रिय खेलकुद परिषद (राखेप)को कभर्ड हलमा सम्पन्न खेलमा पहिलो सेट निराशाजनक सुरू गरेको नेपालले १२-२५ को हार बेहा¥यो । दोस्रो सेट २४-२६ ले भारतलाई सुम्पिएको नेपालले तेस्रो सेट २५-२१ ले आफ्नो पक्षमा पार्दै खेलमा फर्किने लक्षण देखाएको थियो । तर, प्रतिस्पर्धात्मक चौथो सेट २५-१९ ले हार्दा नेपाल समूह ‘ए’ को उपविजेता बन्यो ।

पहिलो सेटमा कुनै पनि समय खेलमा हावी हुन नसकेको नेपालले दोस्रो सेटमा भारतलाई कडा चुनौती दिएको थियो । एक समय १३-१६ को अग्रता बनाएको नेपाल सम्हालिन सकेन । भारतलाई लगातार तीन अंक दिएपछि मात्रै १ अंक जोड्यो । पुनः २१ अंक भारतको हुँदा २३ अंक पुर्याएको नेपालले लगातार दुई अंक गुमाउँदा खेल २४-२४ भएको थियो । त्यसपछि लगातार दुई अंक ल्याउँदै भारतले दोस्रो सेटमा २६-२४ ले नेपाललाई हरायो ।

तेस्रो सेटमा कप्तान अरूणा शाहीले उत्कृष्ट ब्लक गर्दै नेपालका लागि पहिलो अंक जोडेकी थिइन । त्यसपछि स्पाइकर सरस्वती चौधरीले सर्भिस नकटाउँदा भारतले १-१ बराबरी गरेको थियो । त्सपछि लगातार भारतलाई टक्कर दिएको नेपालले पहिलो पटक १९-२३ बनाउँदै चार अंकको अग्रता बनायो र सोही अग्रतालाई कायम राख्दै नेपालले २५-२१ को जीत निकालेको थियो।

प्रतिस्पर्धात्मक बनेको चौथो सेटमा नेपालले एक पटक पनि भारतविरूद्ध अग्रता लिन सकेन । एक पटक १९-१९ भएको अवस्थामा नेपालले लगातार ५ अंक गुमाउँदा भारतलाई जीत सहज भयो ।

नेपाललाई हराएसँगै समूह विजेता बनेको भारतले सेमिफाइनलमा उज्वेकिस्तानसँग खेल्नेछ । पराजित भए पनि एक खेलअगावै सेमिफाइनल पुगेको नेपालले अब फाइनल प्रवेशका लागि कजाकिस्तानसँग खेल्नेछ ।