मोबाइलमा ‘रिङ ब्याकटोन’ बजाउँदैमा छुवाछुत अन्त्य हुँदैन : अनिशा नेपाली (भिडिओ)

काठमाडौं । राप्रपाकी सांसद अनिशा नेपालीले जातीय छुवाछुत अन्त्य गर्न सदनबाट ठोस निर्णय गर्न माग गरेकी छन् । प्रतिनिधिसभाको बुधबार बसेको बैठकको शून्य समयमा उनले दलित समुदायका हक र अधिकार संविधानको धारा र नारामै सीमित भएको गुनासो गरिन् ।

शून्य समयमा बोल्दै उनले भनिन्, ‘सम्माननीय सभामुख महोदय, भर्खरै जेठ २१ गते जातीय छुवाछुत तथा उन्मुलन दिवस मोबाइलमा ‘रिङ व्याकटोन’ बजाइयो । भन्दा जातीय छुवाछुत सामाजिकरूपमा निन्दनीय र कानूनीरूपमा दण्डनीय छ भनेर भनिन्छ । तर, दलित समुदायका हक र अधिकार संविधानको धारा र नारामै सीमित छन् । अहिलेसम्म समाजमा जातीय विभेदको अन्त्य भएको छैन । संविधानको धारा २४ र ४० को उपधारा १ देखि ६ र धारा ४२ सम्म दलित हक भनेर मौलिक हक भनेर उल्लेख भए पनि जातकै कारण धेरैले ज्यान गुमाउनुपरेको छ । ऐन अनुमोदन भएपछि छुवाछुतविरुद्धको कानून बलियो हुन सकेको छैन । र, दलित समुदायले छुवाछुतको युगिन दासत्व र अन्यायको चपेटामा बाँचिरहनुपरेको छ । त्यसैले जातीय छुवाछुत अन्त्य गर्न अहिलेकै सदनबाट ठोस निर्णय गर्नका लागि अनुरोध गर्न चाहान्छु ।’