प्रस्तावित प्रधानन्यायाधीश कार्कीसँग सवाल-जवाफ हुँदै

काठमाडौं । संसदीय सुनुवाइ समितिमा आज प्रस्तावित प्रधानन्यायाधीश हरिकृष्ण कार्कीसँग सवाल-जवाफ हुँदैछ । समिति बैठक बिहान ८ बजे डाकिएको छ । कार्कीविरुद्धको उजुरीमाथि सुनुवाइ भई हिजो उनीसँग छलफल भएको थियो ।

हिजोको बैठकमा कार्कीले अदालतमा बिचौलियाको प्रभाव निस्तेज गर्न प्रभावकारी कानून बनाउने योजना पेश गरेका थिए ।

संसदीय सुनुवाइ विशेष समितिमा आफ्नो योजना पेश गर्दै कार्कीले बिचौलियाको रूपमा पहिचान भएका व्यक्तिहरूको गतिविधि सूक्ष्म निगरानीमा राख्ने बताए ।

कार्कीको लिखित कार्ययोजनामा बिचौलिया नियन्त्रणका लागि छुट्टै संयन्त्र गठन गरी दोषीउपर कारबाहीका लागि सम्बन्धित निकायमा सिफारिस गर्ने उल्लेख छ ।

त्यस्तै बिचौलिया नियन्त्रणको कार्यलाई थप प्रभाकारी बनाउन छुट्टै कानून र कार्ययोजना निर्माण गर्ने समेत कार्कीले बताएका छन् । कार्कीले न्यायपालिका सुधारका लागि सहकार्य,समन्वय र सहकारितामा आधारित दस्ताबेज बनाउने सोच आफूले राखेको बताए ।

सवाल-जवाफपश्चात संसदीय सुनुवाइ समितिले नाम अनुमोदन गरे कामु प्रधानन्यायाधीश कार्की सर्वोच्चको प्रधान्यायाधीशमा नियुक्तको बाटो खुल्नेछ । गत वैशाख २५ गते संवैधानिक परिषद् बैठकले कार्कीलाई प्रधानन्यायाधीश नियुक्तिका लागि सिफारिस गरेको थियो । परिषद्को सिफारिस संसदीय सुनुवाइ समितिले अनुमोदन गरेपछि राष्ट्रपतिबाट नियुक्त हुने संवैधानिक प्रावधान छ ।