आजदेखि सुर्खेतको विरेन्द्रनगरमा माइक्रोबस सञ्चालनमा, भाडादर २० रुपैयाँ

सुर्खेत । कर्णाली प्रदेशको राजधानीको वीरेन्द्रनगरमा आजदेखि माइक्रो बस सेवा सञ्चालन भएको छ । पहिलो पटक वीरेन्द्रनगरमा माइक्रो वस सेवा सुरु भएको हो ।

वीरेन्द्रनगरको फोरलेन सडकको धुलियाविटबाट मंगलगढी–यरिचोकहुँदै मुलपानी चोकदेखि प्रदेश अस्पताल भएर बाँगेशीमलसम्म पुग्नेगरी माइक्रो गाडी सञ्चालन गरिएको छ । यात्रुहरुलाई सहज सेवा दिन र सहुलियत भाडादर २० रुपैयाँ कायम गरिएको छ ।

वीरेन्द्रनगर नगरपालिका प्रमुख मोहनमाया ढकालले नगरबासीका लागि माइक्रोबस सेवा आरम्भ भएकोमा खुसी व्यक्ति गरिइन् ।

वीरेन्द्रनगरका नागरिकको आवश्यकताअनुसार नगर माइक्रोबस सेवाले सुरक्षित र भरपर्दो सेवा प्रदान गर्नेमा विश्वस्त रहेको बताइन् ।

‘सुरक्षित वीरेन्द्रनगर बनाउने अभियानमा हामी पूर्णरुपमा लागिपरेको छौँ । बसपार्कलाई अझै फराकिलो र पार्किङका लागि वीरेन्द्रनगरले नयाँ योजना ल्याउने सोचेका रहेका छौँ ।’ प्रमुख ढकाल भनिन्

त्यस्तै, सुर्खेत काँक्रेविहार यातायात प्रालिका अध्यक्ष रमेश सापकोटाले वीरेन्द्रनगर भ्याली भित्र १० वटा माइक्रो बस सञ्चालन जानकारी दिएका छन् ।

आगामी दिनहरुमा नगर माइक्रो सेवा मंगलगढी–काँक्रेविहार, मंगलगढी–एरपोट चोक–बामेखोला, मंगलगढी–गणेशचोक–आँखा अस्पतालचोकहुँदै कालिन्चोक–नेवारे पिपिरा, गणेशचोक–प्रदेश अस्पताल–बाँगेशीमल रुट थप गरिनेछ । साथै, गणेश चोक–कारागार–टेलिकमहुँदै कपासे रुट समेत थप गरिने सापकोटाको भनाइ छ ।