हरि खड्का र निराजन रायमाझीको गोल कीर्तिमान नजिकै पुगे अन्जन

काठमाडौं । नेपाली राष्ट्रिय फुटबल टोलीका प्रभावशाली स्ट्राइकर अन्जन विष्टले सिनियर अन्तर्राष्ट्रिय फुटबलमा आफ्नो गोल संख्या १२ पुर्याएका छन् ।

भारतमा जारी साफ च्याम्पियनसिपको बुधबार भएको नेपालको पहिलो खेलमा कुवेतविरुद्ध गोल गर्दै अन्जन सर्वाधिक अन्तर्राष्ट्रिय गोलको राष्ट्रिय कीर्तिमान बराबरी नजिक पुगेका हुन् ।

हरि खड्का र निराजन रायमाझीले नेपालका लागि समान १३ गोल गरेका थिए। हरिको कीर्तिमानलाई निराजनले सन् २००८ मा बराबरी गरेका थिए। हरिले २० वर्षअघि बनाएको कीर्तिमान अझै तोडिन सकेको छैन। सन् २०१९ मा चाइनिज ताइपेईविरुद्ध दुई गोल गरेर सिनियर अन्तर्राष्ट्रिय फुटबलमा गोलको खाता खोलेका अन्जन त्यसयता लगातार लयमा छन् ।

गत सेप्टेम्बरमा बंगलादेशसँग भएको मैत्रिपूर्ण खेलमा नेपाल ३-१ गोलले विजयी हुँदा सबै गोल अन्जनले गरेका थिए। त्यसको दुई महिनापछि पाकिस्तानसँग भएको मैत्रिपूर्ण खेलमा नेपाल १-० गोलले विजयी भएको थियो, अन्जनकै निर्णायक गोलमा ।

अन्जनले सन् २०१९ मा २, सन् २०२१ मा ५, सन् २०२२ मा ४ गोल गरेका थिए भने सन् २०२३ मा पहिलो गोल गरेका हुन् । अन्जनले गोल गरेपनि बुधबारको खेलमा नेपाल कुवेतसँग ३-१ गोलले पराजित भयो ।

अन्जनले अघिल्ला ४ खेलमा गोल गर्न सकेका थिएनन् ।