‘आदिपुरुष’बाहेकका विदेशी फिल्म प्रदर्शन गर्ने चलचित्र संघको निर्णय

काठमाडौं । नेपाल चलचित्र संघले दक्षिण भारतीय चलचित्र ‘आदिपुरुष’बाहेक नेपालमा अन्य विदेशी फिल्महरू प्रदर्शन गर्ने भएको छ।

बिहीवार पाटन उच्च अदालतले काठमाडौं महानगरलाई भारतीय फिल्मको प्रदर्शनलाई रोक नलगाउन अल्पकालिन अन्तरिम आदेश दिएको थियो। आदेश जारी भएसँगै हल संचालकहरुले शुक्रबारदेखि यसअघि प्रदर्शन भैसकेको ‘जरा हट्के जरा बचके’लाई पुनः रिलिज गरेका छन्।

अदालतले सेन्सर पास भइसकेका फिल्मलाई समेत रोक नलगाउने आदेश दिएसँगै ‘आदिपुरुष’को प्रदर्शनको लागि पनि बाटो खुलेको थियो। ‘आदिपुरुष’ रिलिज होला या नहोला भन्ने कौतुहलकाबीच नेपाल चलचित्र संघले भने अर्को आदेश नआउन्जेल ‘आदिपुरुष’ हलमा नलगाउने भएको छ ।

संघका महासचिव नरेन्द्र महर्जनले जारी गरेको विज्ञप्तिमा लेखिएको छ, ‘श्री उच्च अदालत पाटनले विपक्षीहरुको नाममा हिन्दी एवम् अन्य चलचित्रहरु प्रदर्शन गर्न बाधा नगर्नु नगराउनु भनी जारी गरेको आन्तरिम आदेशलाई पालना गर्दै अक्रो आदेश नभएसम्म हिन्दी चलचित्र आदिपुरुषबाहेक अन्य स्वदेशी तथा विदेशी चलचित्रहरु आजबाट देशभर प्रदर्शन गरिनेछ। नेपालको कानूनको अधीनमा रही स्वतन्त्र रुपमा व्यवसाय गर्न पाउनु हाम्रो नैसर्गिक अधिकार हो। राष्ट्र र राष्ट्रियताभन्दा माथि कोही पनि छैन।’

काठमाडौं महानगरपालिकाका प्रमुख बालेन्द्र शाहले हिन्दी चलचित्र ‘आदिपुरुष’को प्रदर्शन रोकेपछि चलचित्र संघले उच्च अदालतमा बालेनविरुद्ध रिट दर्ता गराएका थिए।