६० वर्षअघिको ‘ढाक्रे’ जीवनशैली अब पर्दामा हेर्न पाइने

काठमाडौं । करिब ६० वर्षअघिको ढाक्रे जीवनशैलीमा आधारित चलचित्र ‘ए ढाक्रे दाइ’ दर्शकमाझ आउने भएको छ । निरञ्जन कसजू (माइला)को निर्देशनमा बनेको चलचित्र आगामी साउन ५ गतेबाट देशभरका हलमा प्रदर्शन हुँदैछ ।

कथाकार र निर्मातासमेत रहेका निर्देशक कसजूले ६ दशकअघिको ऐतिहासिक विषयमा चलचित्र निर्माण गरेको बताएका छन् ।

‘त्यतिबेला पहाडतिरबाट एक दुई महिनै हिँडेर ढाक्रेहरु बटौली बजार आउँथे र जडीबुटी, घिउ, भटमासहरु बेचेर नून, तेल, लत्ता–कपडालगायतका अत्यावश्यक सामग्रीहरु किनेर लान्थे’, निर्देशक कसजू भन्छन्, ‘हाम्रा अग्रजहरुले खेपेको सोही दुःखकष्टको जीवन भोगाइलाई चलचित्रमा प्रस्तुत गरेको छु ।’

उनले तत्कालीन ऐतिहासिक ग्रामीण जीवनलाई अहिलेको पुस्ताले पर्दामा भए पनि हेरुन् भनेर चलचित्र निर्माण गरेको बताए ।

चलचित्रमा ध्रुव कोइराला, मिनुज रानामगर, माया थामी, उषा फौजालगायतले अभिनय गरेका छन् । सुमन थापा र विनोद चौधरीले खिचेको चलचित्रमा सुरेश सेन्चुरीको संगीत, एनके एम र तेजप्रसाद पाण्डेको शब्द र लोकेन्द्र शाह र एनके एमको नृत्य निर्देशन छ ।

युनिक मुभिजको प्रस्तुतिमा राजन कसजू सहनिर्माता रहेको चलचित्रको सम्पादन विजय पोखरेल र विनोद चौधरीले गरेका हुन् । चलचित्रको वितरण आरआर फिल्म प्रोडक्शनले गर्दैछ ।