रवि लामिछाने लक्षित प्रचण्डको टिप्पणी- भ्रष्टाचारको होहल्ला गरेर जनतालाई भ्रम छर्नेहरुको हावा खुस्किसक्यो

काठमाडौं । प्रधानमन्त्री पुष्पकमल दाहाल प्रचण्डले प्रतिक्रियावादीहरुलाई आफूहरुले भ्रष्टाचारविरुद्ध चालेको एकपछि अर्को ब्याटल मन नपरेको टिप्पणी गरेका छन् ।

पार्टी निकट अखिल क्रान्तिकारी स्ववियु काउन्सिलको भेलालाई सम्बोधन गर्दै उनले भ्रष्टाचारविरुद्धको फाइल खोलेर लडाइँ छेडेपछि विरोधी शक्तिहरु हैरान भएको बताए ।

उनले रवि लामिछाने नेतृत्वको राष्ट्रिय स्वतन्त्र पार्टीलाई लक्षित गरेर भ्रष्टाचारबारे होहल्ला गर्नेहरुको हावा खुस्किएको बताए ।

प्रचण्डले भने, ‘अब भ्रष्टाचारको होहल्ला गरेर जनतालाई भ्रम दिने हावाहरु र तिनीहरुका बेलुनहरु फुटेका छन् । उनीहरुको बेलुनको हावा खुस्किएको छ । त्यसैले साँचो अर्थमा यो लडाइँको नेतृत्व कसले गर्नसक्छ भन्ने स्थापित भएको छ ।’