हिमेशले परीक्षा दिँदै गर्दाको फोटो सामाजिक सञ्जालमा हालेपछि…

काठमाडौं । चर्चित टिभी रियालिटी शो कमेडी च्याम्पियनको पहिलो सिजनका विजेता हिमेश पन्तले आज सामाजिक सञ्जालमा एउटा तस्वीर पोस्ट गरे, जसलाई लिएर उनीमाथि धेरैले प्रश्न उठाएका छन् । यो तस्वीर थियो, उनले परीक्षा दिँदै गर्दाको ।

‘स्नातकोत्तर राजनीतिशास्त्रको परीक्षा हुँदै गर्दा…’ भन्दै हिमेशले फोटो शेयर गरेका थिए । तस्वीरमा उनी प्रश्नपत्र नियालिरहेका देखिन्छन् ।

सामान्यतया कुनै पनि परीक्षामा परीक्षार्थीलाई मोबाइल बोक्न अनुमति हुँदैन । त्यसो भए हिमेशले कसरी परीक्षा दिइरहेको फोटो खिचे भन्ने प्रश्न उठेको छ ।

यस विषयमा हामीले हिमेशलाई सोध्दा उनले यो कुनै महत्वपूर्ण परीक्षा नभएको बताए ।

‘यो कलेजको आन्तरिक परीक्षा मात्रै थियो, मोबाइल बोक्न रोकटोक थिएन’, उनले भने, ‘उत्तर लेख्न थाल्नुभन्दा अगाडि स्मरणका लागि फोटो खिचेर राखेको हुँ ।’

हिमेश अहिले आरआर कलेजमा अध्ययनरत छन् । उनी राजनीतिमा समेत व्यस्त छन् । गत संसदीय चुनावमा उनी राष्ट्रिय स्वतन्त्र पार्टीबाट उम्मेदवार बनेर पराजित भएका थिए ।